قانت ديابەتىنىڭ العاشقى بەلگىلەرى قانداي؟

None
استانا. قازاقپارات - كوپشىلىك ادام قانت ديابەتى ءتاتتىنى كوپ جەيتىندەردە پايدا بولادى دەپ ويلايدى. الايدا بۇل ولاي ەمەس.

بۇل اۋرۋ مەتابوليزمنىڭ بۇزىلۋىمەن بايلانىستى جانە ۇزاق ۋاقىت قاجەت ەم الماعاندىقتان، ول قاۋىپتى اسقىنۋلارعا اكەلەدى. ادام ديابەتتىڭ العاشقى بەلگىلەرىن قالاي انىقتاي الادى؟

قانت ديابەتى دەگەن نە؟

قانت ديابەتى زات الماسۋدىڭ بۇزىلۋىمەن بايلانىستى. ول قانداعى قانت دەڭگەيىنىڭ (گليۋكوزا) سوزىلمالى جوعارىلاۋىمەن سيپاتتالادى.

بۇل اۋرۋدىڭ پايدا بولۋ سەبەبى - قان اينالىم جۇيەسىنەن گليۋكوزانى الىپ تاستاۋعا جانە ونىڭ ادام بۇلشىقەتتەرىنە سىڭۋىنە جاۋاپ بەرەتىن ينسۋلين ءبولىنۋىنىڭ جانە ونىڭ جۇمىس ىستەۋىنىڭ بۇزىلۋى. كومىرسۋلار - اعزا ءۇشىن تاماقتانۋ كوزى: ينسۋلين اسەرىنەن ول گليۋكوزاعا دەيىن ىدىراپ، ورگاندار جۇيەسى مەن تىندەرگە تۇسەدى.

ەگەر بۇل پروتسەستەر بۇزىلسا، قانداعى گليۋكوزا دەڭگەيى كوبەيىپ، ديابەت تۋدىرادى. بۇرىن بۇل اۋرۋعا ەگدە جاستاعى ادامدار شالدىعادى دەپ سانالاتىن، الايدا قازىر قانت ديابەتىمەن جاستار دا، جاس وسپىرىمدەر دە قينالادى.

قانت ديابەتىنىڭ تۇرلەرى

ديابەتتىڭ ءبىرىنشى جانە ەكىنشى ءتيپى جيى كەزدەسەدى. قانت ديابەتىنىڭ ءبىرىنشى ءتيپى (ينسۋلينگە تاۋەلدى) ينسۋلين بولەتىن ۇيقى بەزى قىزمەتىنىڭ پروبلەمالارىمەن بايلانىستى. بۇل اۋتويممۋندى اۋرۋ: ۇيقى بەزىنىڭ ءبىراز جاسۋشاسى بۇزىلادى، سونىڭ سالدارىنان قانداعى ينسۋلين مولشەرى ازايادى، كومىرسۋلار ءسىڭۋى ناشارلايدى، گليۋكوزا قانعا جينالا باستايدى، ال بۇلشىقەتتەر ونى دۇرىس المايدى. ديابەتتىڭ بۇل ءتۇرى جيى 30-35 جاستاعى ادامداردا كەزدەسەدى.

قانت ديابەتىنىڭ ەكىنشى ءتيپى (ينسۋلينگە تاۋەلسىز) ۇزاق ۋاقىتقا دەيىن ەش بەلگىسىز وتەدى. بۇل كەزدە ينسۋلين اعزادا جەتكىلىكتى، ءبىراق ول قاجەت تۇردە جۇمىس ىستەمەيدى. ەكىنشى ءتيپتى قانت ديابەتى كوبىنە جاسى 35 تەن اسقان ناۋقاستاردا پايدا بولادى.

قانت ديابەتىنىڭ نەگىزگى بەلگىلەرى

ديابەت ءار ادامدا ءارتۇرلى داميدى، دەسە دە ۋاقىت وتە ولاردا بۇل پاتولوگيانىڭ ورتاق بەلگىلەرى پايدا بولادى:

جيى ءزار شىعارۋ؛

شولدەي بەرۋ، اۋىزدىڭ قۇرعاۋى؛

قارىننىڭ اشا بەرۋى؛

ۇيقىسىزدىق پەن كۇندىزگى ۇيقىشىلدىق؛

سوزىلمالى شارشاڭقىلىق؛

جارالاردىڭ باياۋ جازىلۋى؛

باس اينالۋ؛

كوورديناتسيانىڭ بۇزىلۋى؛

قول مەن اياقتىڭ ۇيۋى؛

ءارتۇرلى دەرماتيتتەر؛

دەنە ماسساسىنىڭ بىردەن تومەندەۋى نەمەسە ارتۋى؛

كورۋمەن بايلانىستى پروبلەمالار؛

باس اۋرۋى؛

زاردەن اتسەتوننىڭ ءيىسى شىعۋ؛

جوعارى قان قىسىمى.

ەگەر وزىڭىزدەن وسى بەلگىلەردىڭ بىرەۋىن نەمەسە بىرنەشەۋىن بايقاساڭىز، بۇل دارىگەرگە قارالۋعا سەبەپ.

قانت ديابەتى قالاي انىقتالادى؟

قانت ديابەتىنىڭ ەكى ءتۇرى دە قان مەن ءزار اناليزى ارقىلى، ونداعى گليۋكوزا دەڭگەيىنە قاراپ انىقتالادى. زاردەگى گليۋكوزا بۇيرەك مەجەسىنەن وتكەننەن كەيىن انىقتالادى، الايدا دارىگەرلەر تەك بۇل ناتيجەگە قارامايدى. سەبەبى بۇل مەجە جاس ۇلعايا دا ارتۋى مۇمكىن.

قان اناليزى ناقتىراق ناتيجە بەرەدى. ەگەر قانداعى قانت دەڭگەيى جوعارى بولسا، دۇرىس دياگنوز قويىلۋ ءۇشىن باسقا كۇنى قايتالاپ قان تاپسىرۋ ۇسىنىلادى.

قانت ديابەتىنىڭ قالاي الدىن الۋعا بولادى؟

ديابەت ءارتۇرلى سەبەپپەن پايدا بولادى، ءبىراق ونىڭ الدىن الۋعا جالپى ەرەجەلەر بار:

سالماقتى باقىلاۋدا ۇستاۋ؛

دۇرىس تاماقتانۋ؛

سۋدى جەتكىلىكتى تۇردە ءىشۋ؛

دارۋمەندەر ءىشۋ؛

سپورتپەن اينالىسۋ.

ەسكەرتۋ: وزدىگىنەن ەمدەلۋ قاۋىپتى. دياگنوزدى تەك دارىگەر قويا الادى.

massaget.kz

سوڭعى جاڭالىقتار