ورال حالىقارالىق اۋەجايى نەلىكتەن رەسەيلىك كومپانيا باسقارۋىنا بەرىلدى - اكىمنىڭ جاۋابى

استانا. قازاقپارات - باتىس قازاقستان وبلىسىنىڭ اكىمى ناريمان تورەعاليەۆ مانشۇك مامەتوۆا اتىنداعى ورال حالىقارالىق اۋەجايىندا كىمدەردىڭ ۇلەسى بار ەكەنىن ايتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ب ا ق وكىلدەرى اكىمنەن: «بۇعان دەيىن باتىس قازاقستان وبلىسىندا مانشۇك مامەتوۆا اتىنداعى حالىقارالىق اۋەجايدى رەسەيلىك وليگارحتىڭ سەنىمگەرلىك باسقارۋعا العانى ۇلكەن داۋ بولعان. ەندى مۇز ايدىنى، ات سپورتى مەكەمەسى، «اق جايىق» فۋتبول كلۋبىنىڭ ستاديونى سياقتى نىساندار وسىنداي جولمەن جەكە قولعا ءوتىپتى. وسىنىڭ سالدارىنان قازىر سپورتشىلار وزدەرىنە ىڭعايلى ۋاقىتتا جاتتىعا الماي ءجۇر ەكەن. مەملەكەت قارجىلاندىراتىن بۇل نىسانداردى سەنىمگەرلىك باسقارۋعا العان كىمدەر؟ رەسەيلىكتەر مە؟ نە سەبەپتى بۇل ماسەلەنى وبلىس اكىمدىگى شەشە الماي وتىر؟» - دەپ سۇراعان ەدى.

وبلىس باسشىسىنىڭ مالىمەتىنشە، ورال اۋەجايى ەسكىرگەن. جالپى، اۋەجاي 2009-جىلدان بەرى جەكە كومپانيانىڭ سەنىمگەرلىك باسقارۋىندا بولعان.

«اۋەجاي تەرمينالى بۇگىنگى كۇننىڭ تالاپتارىنا سايكەس كەلمەدى. سوعان بايلانىستى ۇشىپ-قونۋعا نەمەسە كەيبىر اۋە رەيستەرىن اشۋعا مۇمكىندىك بولمادى. ەڭ قيىنى، جولاۋشىلار جەرتولەگە ءتۇسىپ بارىپ ۇشاققا وتىراتىن ەدى. تومەن تۇسۋگە مۇگەدەك جانداردىڭ، بالالى انالاردىڭ ەش مۇمكىندىگى بولمادى»، - دەدى ءوڭىر باسشىسى.

ونىڭ اتاپ وتۋىنشە، اۋەجايعا 6,6 ميلليارد تەڭگەگە جوندەۋ جۇمىستارى جۇرگىزىلگەن. الاڭى 10 مىڭ شارشى مەترگە ۇلعايتىلعان.

«نەگە رەسەي كومپانياسى؟ جالپى، وزدەرىڭىز بىلەتىن بولارسىزدار، بۇل اۋەجايدىڭ جىرى ءبىرازدان بەرە كەلە جاتىر. بۇگىندە رەسەيلىك «رەترانس» كومپانياسىنىڭ اۋەجايدا 49 پايىز ۇلەسى بار. 49 پايىزى قازاقستان ازاماتى داۋلەتحان قيلىبايەۆقا تيەسىلى. قالعان 2 پايىزى دا قازاقستان ازاماتىندا، ياعني، 51 پايىزى بىزدە. ول - باسقارۋشى كومپانيا. دەمەك، اۋەجايدىڭ ۇشىپ-قونۋ جولاعى، تەرمينالى مەملەكەت مەنشىگىندە. ولاردىڭ مەنشىگىندە تەك قانا ۇشاق ۇشىپ كەلگەندە بۇرىلاتىن شاعىن ۋچاسكە مەن تۇراق بار. قالعان بارلىق ستراتەگيالىق نىسان مەملەكەت مەنشىگىندە»، - دەدى ناريمان تورەعاليەۆ.

ونىڭ اتاپ وتۋىنشە، مۇز ايدىنى، ستاديون سىندى نىساندار باسەكەلەستىك ورتادا بولۋى ءتيىس.

«بۇگىندە مۇز ايدىنى قاتەلەسپەسەم رۋبتسوۆ دەگەن ازاماتتا. سول ازاماتقا 2021 نە 2022-جىلى سەنىمگەرلىك باسقارۋعا بەرىلدى. قازىر جۇمىس ىستەپ جاتىر. ءبىز سەنىمگەرلىك باسقارۋعا العان كومپانيالاردىڭ الدىنا ناقتى تاپسىرمالار قويىپ وتىرمىز. ولار جۇمىس ىستەيمىز دەپ الدى... ولار كەلىسىمگە سايكەس تالاپتاردى ورىنداۋى كەرەك. ەگەر كەلىسىمشارتتا كورسەتىلگەن تالاپتار ورىندالماسا، حالىققا ساپالى قىزمەت كورسەتپەسە، وندا مەملەكەت نىساندى قايتارىپ الۋعا قۇقىلى، ياعني مەملەكەتتىڭ ونداي قىزمەتى كوزدەلگەن. نىساندار جەكەگە ءوتىپ كەتكەن جوق. ۋاقىتشا سەنىمگەرلىك باسقارۋعا بەرىلدى»، - دەدى وبلىس باسشىسى.