شىعىس قازاقستانداعى اۋىلداردىڭ جارتىسىنان استامىندا موبيلدى ينتەرنەت جوق - باعدات مۋسين

وسكەمەن. قازاقپارات - شىعىس قازاقستان وبلىسىنداعى اۋىلداردىڭ جارتىسىنان استامىندا موبيلدى ينتەرنەت جوق.

بۇل تۋرالى وسكەمەندە ءوڭىر تۇرعىندارىمەن كەزدەسكەن ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ءمالىم ەتتى، دەپ حابارلايدى قازاقپارات ءتىلشىسى.

مينيستر شىعىس قازاقستان وبلىسىنا جۇمىس ساپارى اياسىندا وسكەمەندەگى د. سەرىكبايەۆ اتىنداعى ش ق ت ۋ قابىرعاسىندا ايماق حالقىمەن كەزدەسۋ وتكىزدى. ءوز سوزىندە ول بۇگىندە مەملەكەتتىك قىزمەتتەردىڭ 80 پايىزى eGov موبيلدى قوسىمشاسىندا قولجەتىمدى ەكەنىن جەتكىزدى.

«اي سايىن 2,5 ميلليون ادام eGov موبيلدى قوسىمشاسىن پايدالانادى. كۇن سايىن قوسىمشاعا 200 مىڭ قولدانۋشى كىرەدى. كورسەتكىش كۇن ساناپ ءوسىپ كەلەدى. ماسەلەن eGov ارقىلى ءبىر جىلدىڭ ىشىندە 43 ميلليون، ال eGov موبيلدى قوسىمشاسىن 18 ميلليون ادام پايدالانعان»، - دەدى باعدات مۋسين.

ونىڭ ايتۋىنشا، ش ق و-داعى 363 ەلدى مەكەننىڭ 197-سىندە موبيلدى ينتەرنەت جوق.

«وبلىس اكىمى دانيال احمەتوۆتىڭ ۇسىنىسىمەن ارنايى جول كارتاسىن قۇردىق. وندا ەلدى مەكەندەرگە ءتيىستى انتەنالار ورناتىپ، موبيلدى ينتەرنەت ماسەلەسىن 2025 -جىلعا دەيىن شەشپەكپىز»، - دەدى مينيستر.

اۆتور:

تالعاتجان مۇحامەتبەك ۇلى