لوندوندا بەس جىگىتپەن توبەلەسكەن قازاق جىگىتى حالىق جيناعان اقشانى «حارەكەت» قايىرىمدىلىق قورىنا اۋداردى
ول بۇگىن رەداكسيامىزعا حابارلاسىپ، حالىق جيناپ بەرگەن 4 ميلليون تەڭگەنى «حارەكەت» قايرىمدىلىق قورىنا اۋدارعانىن حابارلادى.
ول بۇل ىسكە لوندوننان قايتىپ كەلە جاتىپ بەل بۋعانىن ايتادى.
«ماديار اعامىزبەن كەزدەسىپ مەنىڭ لوندونداعى جاعدايىما بايلانىستى حالىق جيناپ بەرگەن اقشانى «حارەكەت» قورىنا اۋداردىم. سەبەبى وتكەندە سۇحباتىمدا ايتقانداي بۇل اقشانىڭ ءبىر تيىنىن دا جۇمساماعان بولاتىنمىن. سەبەبى حالىقتىڭ اقشاسى - امانات. پاميرلىك جىگىتتەر ارىزىن قايتىپ العاندىعى سەبەپتى، اقشا قورعاۋشىعا جۇمسالعان جوق. سوندىقتان بۇل اقشانى يگى ىسكە جۇمساۋدى شەشتىم»، - دەيدى بەكزات امانجول.
View this post on Instagram
اتالمىش قوردىڭ قۇرىلتايشىسى ماديار سەرىكبايەۆ الداعى ۋاقىتتا بۇل اقشاعا مۇقتاج جانعا ءۇي الىپ بەرەتىنىن ايتتى.
«جىگىتتىڭ موينىنداعى قىل ارقان شىرىمەيدى. جىگىتتىڭ باسىنا نە كەلىپ، نە كەتپەيدى. وزدەرىڭىز كورگەن دە شىعارسىزدار، بەكزات باۋىرىمىز شەتەلدە ءبىر قيىندىققا تاپ بولىپ، جالا جابىلىپ، سوعان بايلانىستى قانشاما حالىق، ەل اعالارى كومەكتەسىپ، قولداۋ كورسەتكەن بولاتىن. قۇدايدىڭ قالاۋىمەن، بارلىق قيىندىقتان ءوتىپ، ەلگە امان-ەسەن كەلدى. بارلىق اقشانى جۇمساماعان ەكەن، ماعان ءوتىنىش جاسادى: «وسىنىڭ بارلىعىن «حارەكەت» قايرىمدىلىق قورىنا اۋدارامىن» دەپ وتىر. الداعى ۋاقىتتا «حارەكەت» قورى مەن بەكزات باۋىرىمىز بەرگەن اقشانى قوسىپ ءبىر مۇقتاج جانعا ءۇي الىپ بەرەمىز»، - دەدى ول.
ايتا كەتەيىك، بەكزات امانجولوۆ لوندونعا 2022-جىلدىڭ تامىز ايىندا بارعان. قۇرىلىستا جۇمىس ىستەگەن. پاتەردە تۇرعان تاجىكستاننىڭ (پامير) بىرنەشە ازاماتىمەن جانجالداسىپ قالعان. ناتيجەسىندە ۇيىنە كەلگەن بەس پامير جىگىتىمەن توبەلەسىپ، ەكەۋىن پىشاقپەن جارالاعان. پوليتسيا ونىڭ ۇستىنەن ءىس قوزعادى. كىناسى دالەلدەنسە، 10 جىلعا سوتتالۋى مۇمكىن ەدى. ءبىراق بەكزات ءوزىنىڭ كىناسىز ەكەنىن، تەك قورعانعانىن ايتتى.