جازدا بالالارعا ارنالعان قانداي كونكۋرستار وتەدى

استانا. قازاقپارات - مادەنيەت جانە سپورت ءمينيسترى اسحات ورالوۆ ۇكىمەت وتىرىسىندا جازدا دارىندى بالالارعا ارنالعان قانداي كونكۋرستار ۇيىمداستىرلاتىنىن اتادى، دەپ حابارلايدى قازاقپارات ءتىلشىسى.

«جازعى دەمالىس كەزىندە «Temps lié» كاسىبي حورەوگرافيالىق ءبىلىم بەرۋدىڭ حالىقارالىق فەستيۆالى، «شابىت» ، «Astana-Merey» حالىقارالىق كونكۋرستارى، «ۇلى دالا ۇرپاقتارى» رەسپۋبليكالىق قولونەر بايقاۋى، «التىن قازىنا» جانە «ارت- كولونوك» بالالار شىعارماشىلىعى رەسپۋبليكالىق كونكۋرستارى وتكىزىلەدى.

مەملەكەتتىك رامىزدەر كۇنىنە وراي بارلىق مەكتەپ لاگەرلەرى مەن بالاباقشالارىندا «قازاقستان مەنىڭ الەمىمدە» اسفالتتا سۋرەت سالۋ كونكۋرسى، «مەنىڭ ەلىم قازاقستان» تاقىرىبىندا ءتۇرلى كونكۋرس جانە «مەنىڭ تۋىم - مەنىڭ ماقتانىشىم» فلەشموبى جوسپارلانۋدا»، - دەدى ۆەدومستۆو باسشىسى.

مينيستر اتالعان ءىس- شارالار مەن جوبالاردىڭ ءبارى اقىسىز بولاتىنىن اتاپ ءوتتى.

«بيىل مينيسترلىك «Qazaqstan Jastar Fest» سپورتتىق- جاستار فەستيۆالىنىڭ جاڭا جوباسىنا باستاماشىلىق جاسادى.

VI جازعى سپارتاكيادا اياسىندا «سپورتتىق جاز» چەللەندجى باستاۋ الادى. اتاقتى سپورتشىلار مەن سپورت جاناشىرلارى الەۋمەتتىك جەلىلەردە قىسقا بەينەروليكتەردى جۇكتەۋ ارقىلى سپورتپەن شۇعىلدانۋدى ناسيحاتتايتىن بولادى. سونىمەن قاتار 23 -ماۋسىمدا ەلىمىزدىڭ بارلىق وڭىرىندە ەلوردانىڭ 25 جىلدىعىن مەرەكەلەۋگە جانە حالىقارالىق وليمپيادا كۇنىنە ورايلاستىرىلعان «مەن سپورتتى تاڭدايمىن!» رەسپۋبليكالىق اكسياسى باستالادى»، - دەدى ول.