قازاقستان- قىتاي حالىقارالىق جۇك اۆتوتاسىمالى ىنتىماقتاستىعىنا تىڭ سەرپىن بەرىلەدى

None
استانا. قازاقپارات - قازاقستان- قىتاي حالىقارالىق جۇك اۆتوتاسىمالى ىنتىماقتاستىعىنا تىڭ سەرپىن بەرىلەدى، دەپ حابارلايدى قازاقپارات يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ.

ق ر پرەزيدەنتى قاسىم-جومارت توقايەۆتىڭ تاياۋداعى قىتاي حالىق رەسپۋبليكاسىنا جاساعان مەملەكەتتىك ساپارىندا ەكى ەلدىڭ ۇكىمەتتەرى حالىقارالىق اۆتوكولىك تاسىمالى باعىتىندا ءوزارا ارىپتەستىكتى دامىتۋ جونىندەگى كەلىسىمگە قول قويعان بولاتىن.

بۇل رەتتە قازاقستان مەن كورشىلەس ەلدىڭ اراسىندا وسى سالاداعى العاشقى كەلىسىم 1992 -جىلى جاسالعانىن ايتا كەتەيىك. ارادا 30 -جىلعا جۋىق ۋاقىت وتكەنىن ەسكەرسەك، اتالعان قۇجاتتى جاڭارتىپ، زامان تالابىنا ساي بەيىمدەۋ قاجەت بولدى.

مالىمەتتەرگە سۇيەنسەك، 2022 -جىلدىڭ قورىتىندىسى بويىنشا ەكىجاقتى جۇك تاسىمالى %65 عا ۇلعايىپ، 265 مىڭ تونناعا جەتكەن. سونداي-اق قىتايلىق جۇكتەردىڭ ترانزيتتىك تاسىمالى 2,6 ەسەگە ءوسىپ، 1,1 ميلليون توننا كولەمىندە بايقالدى.

ال جاڭا كەلىسىمگە سايكەس جۇك تاسىمالى سالاسىندا سيفرلى تەحنولوگيالاردى ەنگىزىپ، كولىك قاتىناسىن جەتىلدىرۋ، ياعني بارىس-كەلىستى رەتتەۋ ارقىلى ەلدەر اراسىنداعى تاۋار تاسىمالىنىڭ كولەمىن ارتتىرىپ، ساۋدا- ەكونوميكالىق ءارى كولىك- لوگيستيكالىق بايلانىستى كۇشەيتۋ كوزدەلگەن.

ماسەلەن، بۇل قۇجات بويىنشا تاراپتار جىل سايىن بەلگىلەنگەن مولشەردە رۇقسات بلانكىلەرىمەن الماساتىن بولادى. اتالعان قۇجات جولاۋشىلار جانە جۇك تاسىمالىن جۇزەگە اسىرۋعا قاجەت. كولىك قۇرالدارىنا ارنالعان رۇقسات قۇجاتتارىن تاسىمالداۋشىلار كەلىسىم جاساسقان ەلدەردىڭ جاۋاپتى ۆەدومستۆولارىنان نەمەسە ولارعا باعىنىشتى ۇيىمداردان الا الادى.

بۇعان قوسا مۇددەلى تاراپتاردىڭ وتىنىشىنە سايكەس ءوزارا كەلىسىم نەگىزىندە قوسىمشا مولشەردە تاسىمالداۋعا ارنالعان رۇقسات بلانكىلەرىمەن الماسۋ جولدارى قاراستىرىلعان. وسى ورايدا رۇقسات بلانكىلەرى قۇزىرلى ورگاننىڭ مورىمەن جانە ونى بەرگەن جاۋاپتى تۇلعانىڭ قولىمەن كۋالاندىرىلۋعا ءتيىس. ال ەلەكتروندى فورماتتاعى رۇقسات قۇجاتىندا جاۋاپتى تۇلعانىڭ ەلەكتروندى تسيفرلى قولتاڭباسى بولۋ قاجەت.

بۇل ورايدا بەرىلگەن رۇقسات بلانكىسىن باسقا تاسىمالداۋشىلارعا نەمەسە ءبىر قولدان ەكىنشى قولعا وتكىزىپ، الماسىپ جۇرۋگە تىيىم سالىناتىنىن ەسكەرتە كەتەيىك. اتالعان قۇجات تەك ءبىر ساپارعا، سونداي- اق جالعىز كولىك قۇرالىنا عانا جارامدى. سونىمەن قوسا ونى كەلەسى جىلدىڭ 31 قاڭتارىنا دەيىن عانا پايدالانۋعا بولادى. تىركەمەلى نەمەسە جارتىلاي تىركەمەسى بار ارالاس ۇلگىدەگى كولىكتەرگە ارنالعان بلانكىلەر تارتقىش جۇك كولىگىنە بەرىلەتىنىن اتاپ وتكەن ءجون.

ءتيىستى رۇقساتتى بەرۋ مەن ونى پايدالانۋ ءتۇرى، كولەمى، ءتارتىبى جانە باسقا دا شارتتارى تۋرالى شەشىمدى وسى كەلىسىمنىڭ 17-بابىنا سايكەس بىرلەسىپ قۇرىلعان كوميسسيا قابىلدايدى.

تۇتاستاي العاندا، جوعارىدا ايتىلعان كەلىسىم اسپان استى ەلىمەن اراداعى الىس- بەرىستى دامىتىپ، حالىقارالىق جۇك اۆتوتاسىمالىنىڭ تامىرىنا قان جۇگىرتەدى دەپ بولجانىپ وتىر. سوندىقتان دا ەكى مەملەكەت اتالعان سەكتورداعى ءوزارا ءتيىمدى ارىپتەستىكتى دامىتۋعا مۇددەلى ءارى بۇل باعىتتاعى بىرلەسكەن جوبالارعا باسىمدىق بەرمەك.


سوڭعى جاڭالىقتار