شەتەلدىك قازاقتارعا «اتا جولى» كارتاسىن بەرۋ تۋرالى بۇيرىق جوبا جاريالاندى

استانا. قازاقپارات - ەڭبەك جانە حالىقتى الەۋمەتتىك قورعاۋ مينيسترلىگى شەتەلدىك قازاقتارعا «اتا جولى» كارتاسىن بەرۋدىڭ ءتارتىبى تۋرالى بۇيرىق جوباسىن جاريالادى، دەپ حابارلايدى قازاقپارات ءتىلشىسى.

قۇجاتتا «اتا جولى» كارتاسىنا مىنانداي انىقتاما بەرىلگەن:

بۇل قۇجات ۇلتى قازاق ەكەنىن راستايتىن قۇجاتى بار، قازاقستان رەسپۋبليكاسىنىڭ زاماتتىعى جوق، «قانداس» مارتەبەسىن الىپ ۇلگەرمەگەن قازاقتارعا بەرىلمەك.

بۇل كارتادان ءۇمىتتى قازاقتارعا مىناداي تالاپتار قويىلادى:

1) قازاق ۇلتىنا جاتاتىنىن راستايتىن قۇجاتتىڭ بولۋى؛

2) قازاقستان رەسپۋبليكاسى ازاماتتىعىنىڭ بولماۋى؛

3) قازاقستان رەسپۋبليكاسىنىڭ ازاماتتىعىنا قابىلداۋدىڭ وڭايلاتىلعان ءتارتىبى بەلگىلەنەتىن ماماندىقتىڭ بولۋى؛

4) قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءمينيسترىنىڭ 2023 -جىلعى 20-اقپانداعى بۇيرىعىنا سايكەس سۇرانىسقا يە كاسىپتەرگە يە بولۋى (بۇل مالىمەتتى «وتانداستار قورى» كوممەرتسيالىق ەمەس اكسيونەرلىك قوعامى نەمەسە قازاقستان رەسپۋبليكاسىنىڭ شەت ەلدەردەگى مەكەمەسى راستاۋى كەرەك)؛

5) تۇراقتى تۇراتىن جانە ازاماتتىعى بار ەلدە تىركەلگەن جۇمىس ىستەپ تۇرعان بيزنەستىڭ بولۋى (بۇل مالىمەتتى «وتانداستار قورى» كوممەرتسيالىق ەمەس اكسيونەرلىك قوعامى نەمەسە قازاقستان رەسپۋبليكاسىنىڭ شەت ەلدەردەگى مەكەمەسى راستاۋى كەرەك).

وسى اتالعان تالاپتارعا ساي شەتەلدىك نەمەسە ازاماتتىعى جوق قازاق «اتا جولى» كارتاسىن بەرۋ تۋرالى ءوتىنىشتى «قۇتتى مەكەن» اقپاراتتىق جۇيەسىنىڭ قوسىمشاسى رەتىندە قۇرىلاتىن موبيلدىك قوسىمشا ارقىلى نە قازاقستان رەسپۋبليكاسىنىڭ شەت ەلدەردەگى وكىلدىك مەكەمەلەرى ارقىلى بەرەدى.

حالىقتى الەۋمەتتىك قورعاۋ جانە جۇمىسپەن قامتۋ ماسەلەلەرى جونىندەگى جەرگىلىكتى اتقارۋشى ورگان ءوتىنىش كەلىپ تۇسكەن كۇننەن باستاپ 2 جۇمىس كۇنى ىشىندە ءوتىنىش بەرۋشىنىڭ قازاقستان رەسپۋبليكاسىنىڭ اۋماعىندا قۇقىق بۇزۋشىلىقتار جاساعانى تۋرالى جانە ولاردىڭ تەرروريستىك نەمەسە ەكسترەميستىك ۇيىمدارعا قاتىسى تۋرالى وزگە دە اقپاراتتى تەكسەرۋ ءۇشىن قۇزىرلى ورگاندارعا قۇجاتتار توپتاماسىن جىبەرەدى. بۇل اقپارات سونداي- اق باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ اقپاراتتىق جۇيەسى ارقىلى دا تەكسەرىلەدى.

«قازاقستان رەسپۋبليكاسىنىڭ شەت ەلدەردەگى مەكەمەسى «اتا جولى» كارتاسىن بەرۋ تۋرالى شەشىم العان ەتنيكالىق قازاقتار جۇگىنگەن كەزدە ولارعا قازاقستان رەسپۋبليكاسىنا كىرۋگە ۆيزا بەرەدى. حالىقتى الەۋمەتتىك قورعاۋ جانە جۇمىسپەن قامتۋ ماسەلەلەرى جونىندەگى جەرگىلىكتى اتقارۋشى ورگان ءوتىنىش بەرۋشى كەلگەننەن كەيىن «اتا جولى» كارتاسىن بەرەدى. «اتا جولى» كارتاسى جوعالعان نەمەسە بۇلىنگەن جاعدايدا ونى يەلەنگەن ادامنىڭ ءوز ءوتىنىشى بويىنشا تەلنۇسقا بەرىلەدى. 16 جاسقا دەيىنگى كامەلەتكە تولماعان بالالار، ەگەر ولاردىڭ اتا- انالارى نەمەسە زاڭدى وكىلدەرى «اتا جولى» كارتاسىنىڭ يەگەرلەرى بولىپ تابىلسا، «اتا جولى» كارتاسىن يەلەنۋشىنىڭ قۇقىقتارىن پايدالانۋعا قۇقىلى.

ەگەر «اتا جولى» كارتاسىندا اتا- اناسىنىڭ بىرەۋى عانا بولسا، كامەلەتكە تولماعان بالا «اتا جولى» كارتاسىن ءوتىنىش بەرگەن كەزدە قازاقستان رەسپۋبليكاسىنىڭ شەت ەلدەردەگى مەكەمەسى كونسۋلىنىڭ قاتىسۋىمەن اتا- اناسىنىڭ ەكىنشىسىنىڭ جازباشا كەلىسىمىنەن كەيىن عانا الا الادى» . - دەپ جازىلعان بۇيرىق جوباسىندا.

«اتا جولى» كارتاسى بەرىلگەن كۇننەن باستاپ 10 جىل بويى جارامدى. ءبىراق ازاماتتىعى بار ەل پاسپورتىنىڭ قولدانىلۋ مەرزىمىنەن اسپاۋى كەرەك.

بۇعان دەيىن ەڭبەك جانە حالىقتى الەۋمەتتىك قورعاۋ مينيسترلىگى كوشى- قون كوميتەتىنىڭ وكىلدەرى اتالمىش كارتانىڭ شەتەلدىك قازاقتارعا قانداي مۇمكنىدىكتەر ۇسىناتىنىن ايتقان ەدى.