بۇگىن ديماشتىڭ تۋعان كۇنى: نيۋ-يوركتە ءانشىنىڭ فوتولارى الىپ ەكراننان كورسەتىلۋدە
بۇگىن ا ق ش-تىڭ نيۋ-يورك قالاسىنداعى تايمس-سكۆەر الاڭىندا ۇلكەن ەكراننان د. قۇدايبەرگەننىڭ فوتولارى كورسەتىلدى.
«سالەم، تايمس-سكۆەر! سالەم، الەم! سالەم، 29 جاس! بارلىقتارىڭىزعا وسىنشاما ۇلكەن قۇرمەتتەرىڭىزگە كوپ راحمەت»، - دەپ جازدى ءانشى Instagram-داعى پاراقشاسىندا.
تايمس-سكۆەردە تۇسىرىلگەن ۆيدەودان ديماشتىڭ ەسىمىن اتاپ ايعايلاعان جانكۇيەرلەردىڭ داۋىسىن ەستۋگە بولادى.
بۇعان دەيىن ديماش ءوزىنىڭ تۋعان كۇنىندە جاڭا ءانىنىڭ بەينەبايانىن جاريالايتىنىن ايتقان بولاتىن.
ديماش (دىنمۇحاممەد) قانات ۇلى قۇدايبەرگەن - ءانشى، كومپوزيتور، مۋلتيينسترۋمەنتاليست. ول 1994 -جىلى اقتوبە قالاسىندا دۇنيەگە كەلگەن. اتا-اناسى - تانىمال انشىلەر قانات جانە سۆەتلانا ايتبايەۆتار.
ديماش العاش رەت سپەكتاكلدە ويناپ، كوپشىلىككە تانىلا باستادى. بەس جاسىندا تۇڭعىش رەت مۋزىكالىق كوللەدج ساحناسىندا ءان سالعان.
التى جاسىندا «اينالايىن» رەسپۋبليكالىق بايقاۋىنىڭ «فورتەپيانو» نوميناتسياسىندا جەڭىمپاز اتاندى.
2010 -جىلى «بايقونىردىڭ اسەم داۋىستارى» حالىقارالىق فەستيۆالىنىڭ I جۇلدە لاۋرەاتى اتاندى.
2012 -جىلى «جاس قانات» رەسپۋبليكالىق جاس ءان ورىنداۋشىلار بايقاۋىنىڭ گران-پري جۇلدەسىنە يە بولىپ، وسى جىلى «ۆوستوچنىي بازار» حالىقارالىق بايقاۋىندا I جۇلدە الدى.
2013 -جىلى ديماش قۇدايبەرگەن «مەيكين ازيا» I حالىقارالىق فەستيۆالىنىڭ جەڭىمپازى بولدى. سونىمەن قاتار ۆيتەبسك قالاسىندا وتكەن «سلاۆيان بازارى-2015» XXIV حالىقارالىق ەسترادالىق ءان ورىنداۋشىلار بايقاۋىندا گران-پري يەلەندى.
2015 -جىلى 28-قازان كۇنى ىستانبۇلدا ديماش «Abu TV» حالىقارالىق ازيا-تىنىق مۇحيت فەستيۆالىندە قازاقستان رەسپۋبليكاسىنىڭ اتىنان العاش رەت قاتىستى.
2014 -جىلى احمەت جۇبانوۆ اتىنداعى مۋزىكالىق كوللەدجدە اكادەميالىق ءان ورىنداۋ سىنىبىن ءتامامداپ، قازاق ۇلتتىق ونەر ۋنيۆەرسيتەتىنىڭ «ەسترادا ونەرى» فاكۋلتەتىنە ءتۇستى. ديماش قازاق، اعىلشىن، ورىس، قىتاي، سەرب، يتاليان، فرانسۋز، تاعى باسقا تىلدەردە ءان ورىندايدى. قىتايدىڭ I am a singer (مەن ءانشىمىن) تەلەبايقاۋىنا قاتىستى. سايىستىڭ بارلىق كەزەڭىنەن ءوتىپ ەكىنشى ورىندى جەڭىپ الدى. اتالعان جوبانى قىتايدىڭ ەڭ ءىرى Hunan TV تەلەارناسى كورسەتەدى.
2017 -جىلى ازيانىڭ «گرەمميى» سانالاتىن «Top Chinese Music Award» سىيلىعىن «ازيانىڭ ەڭ تانىمال ءانشىسى» اتالىمىندا جەڭىسكە جەتتى. كوپتەگەن حالىقارالىق جۇلدەلەردىڭ يەگەرى.