تالانتتى جاستار بەدەلدى حالىقارالىق فەستيۆالدار مەن كونكۋرستارعا جولدامامەن جىبەرىلەدى

استانا. قازاقپارات - تالانتتى جاستار بەدەلدى حالىقارالىق فەستيۆالدار مەن كونكۋرستارعا جولدامامەن جىبەرىلەدى. بۇل جايىندا ەلىمىزدىڭ مادەني ساياساتىنىڭ تۇجىرىمداماسىن تانىستىرعان مادەنيەت جانە سپورت ءمينيسترى اسحات ورالوۆ ءمالىم ەتتى، دەپ حابارلايدى قازاقپارات ءتىلشىسى.

«جاھاندىق الەمدەگى زاماناۋي قازاقستاندىق مادەنيەت» جوباسى اياسىندا ەلىمىزدىڭ بارلىق وڭىرلەرىنەن تالانتتى جاستار بەدەلدى حالىقارالىق فەستيۆالدار مەن كونكۋرستارعا جولدامامەن جىبەرىلەدى. ۇزدىك ۇيىمدارعا، سونداي- اق مادەنيەت جانە ونەر قايراتكەرلەرىنە جىل سايىن Umai ۇلتتىق سىيلىعى تابىستالادى. روزا باعلانوۆا اتىنداعى «قازاق كونسەرت» مەملەكەتتىك كونسەرتتىك ۇيىمىنىڭ جانىنان رەسپۋبليكالىق دەڭگەيدە ۇلتتىق ءداستۇرلى مادەنيەت پەن ونەردى ناسيحاتتاۋعا باعىتتالعان «حالىق قازىنا» ۇلتتىق ونەر ورتالىعى قۇرىلدى»، - دەپ جازادى مينيستر Telegram پاراقشاسىندا.

ونىڭ اتاپ وتۋىنشە، ورتالىقتىڭ نەگىزگى قىزمەتى: كونسەرتتىك ءىس- شارالار وتكىزۋ، رەسپۋبليكالىق جانە حالىقارالىق دەڭگەيدەگى مادەني جوبالاردى ىسكە اسىرۋ (كوركەمسۋرەت كونكۋرستارى، مۋزىكالىق- ەتنوگرافيالىق كورمەلەر جانە ت. ب. )، ۇلتتىق مۋزىكالىق اسپاپتار مەن شەبەرلىك ساباقتارى، سەمينارلار (ونلاين جانە وفلاين فورماتتاردا) وتكىزۋ، اۋديو جانە بەينەجازبالار جيناقتالعان اندەر مەن كۇيلەر جيناعىن شىعارۋ، ەلىمىز بەن شەتەلدە گاسترولدىك ساپارلار.

«جوعارىدا ايتىلعانداردى قورىتىندىلاي كەلە، ءبىز مادەنيەتتى حالىققا قولجەتىمدى ەتىپ، الەمدە ونەرىمىزدىڭ تانىمالدىلىعىن ارتتىرۋ، قازاقستاننىڭ تاريحي- مادەني مۇراسىن ساقتاۋ جانە ونى حالىقارالىق دەڭگەيدە تانىمال ەتۋ سىندى مىندەتتەردى جۇزەگە اسىرعىمىز كەلەدى. ورىندالمايتىن ماقسات جوق، سوندىقتان دا بەلگىلەنگەن باعىتتار بويىنشا بەلسەندى جۇمىس ىستەيمىز»، - دەدى اسحات ورالوۆ.