ەلوردادا نەيروحيرۋرگتەر سەگىزكوزگە ەرەكشە وتا جاساپ، قاتەرلى ىسىكتى الىپ تاستادى
قۇنى 5 ميلليون تەڭگەگە جۋىقتايتىن بۇل وتا ءمامس جۇيەسى بويىنشا جاسالدى، دەپ حابارلايدى قازاقپارات الەۋمەتتىك مەديتسينالىق ساقتاندىرۋ قورى فيليالىنا سىلتەمە جاساپ.
دارىگەرلەردىڭ ايتۋىنشا، بۇل ەرەكشە وتادان كەيىن ناۋقاس ەمىن-ەركىن ءجۇرىپ- تۇرا الادى.
بۇرىن مۇنداي جاعدايدا سەگىزكوزدى نەرۆ جۇيەلەرىمەن قوسا كەسىپ تاستايتىن.
ياعني ىسىكتى الۋدىڭ جالعىز جولى وسى بولعان. الايدا ونداي وتادان كەيىن ناۋقاس ارباعا تاڭىلىپ قالاتىن.
قالا تۇرعىنى گاۋحار احمەتوۆا وتكەن جىلدان بەرى بەلى اۋىرىپ، بارلىق تەكسەرۋدەن وتەدى. قۇيىمشاق تۇسىنداعى شىداتپاس دەرتتەن ايىعۋدىڭ ءتۇرلى امالىن قاراستىرادى.
تۇركيا، يزرايل ەلدەرىندەگى دارىگەرلەرگە دە حابارلاسادى.
ونداعى دارىگەرلەر وتا قۇنى 50 مىڭ ەۋرو تۇراتىنىن، ءبىراق وتادان كەيىن ءجۇرىپ كەتەتىنىنە ەشقانداي كەپىلدىك بەرە المايتىندارىن ايتقان.
ويلانا كەلە ول مەديتسينالىق كومەك الۋ ءۇشىن ۇلتتىق نەيروحيرۋرگيا ورتالىعىنىڭ دارىگەرلەرىنە جۇگىنەدى.
ناۋقاستى جان- جاقتى تەكسەرۋدەن وتكىزگەن ماماندار وتا جاساۋ جولدارىن ويلاستىرادى.
«سەگىزكوزدىڭ ىشىندە كىشى- ۇلكەن دارەتتى، اياقتىڭ قيمىل-قوزعالىسىن رەتتەپ تۇراتىن نەرۆ جۇيكەلەرى ورنالاسقان. ال ول تۇگەل الىنسا ناۋقاسقا وتە اۋىر بولادى. ءبىز جاساعان وتانىڭ ەرەكشەلىگى - ىسىكتى سەگىزكوزىمەن الىپ تاستاپ، ىشىندەگى نەرۆ جۇيەلەرىن ساقتاپ قالدىق»، - دەپ ءتۇسىندىردى نەيروحيرۋرگ-ددارىگەر تالعات كەرىمبايەۆ.
ايتا كەتەيىك، م ءا م س بويىنشا جاسالعان بۇل وتانىڭ قۇنى - 5 ميلليون تەڭگەگە جۋىق.
«مىقتى ماماندار بىزدە دە بار ەكەنىنە كوزىم جەتتى. شىنىمدى ايتسام، بۇلاي ءجۇرىپ كەتەم دەپ ويلامادىم. ءوزىمىزدىڭ وتاندىق دارىگەرلەردىڭ ەپتىلىگىنە، بىلىكتىلىگىنە باس ءيدىم. ايتار العىسىم شەكسىز» - دەيدى گاۋحار احمەتوۆا.
ۇلتتىق نەيروحيرۋرگيا ورتالىعىنىڭ دارىگەرلەرى بۇل وتانى تاعى بىرنەشە ادامعا جاساپ، اياعىنان تۇرعىزعان.
ەندى عىلىمي ماقالالار جازىپ جاريالاۋ ارقىلى بۇل وتا جاساۋ ءادىسىن الەمدىك دەڭگەيگە جەتكىزۋدى كوزدەپ وتىر.
جالپى، ورتالىقتا جىلىنا 4 مىڭنان استام وتا جاسالادى، ونىڭ ىشىندە ومىرتقاعا جاسالاتىن ەڭ كۇردەلى وپەراتسيالار دا بار.