قاراعاندىلىق وقۋشى «جۋسان ءيىسى» شىعارماسى نەگىزىندە ۇستەل ويىنىن قۇراستىردى
اتالمىش شىعارما جالپى ورتا جانە نازاربايەۆ زياتكەرلىك مەكتەپتەرىنىڭ وقۋ باعدارلاماسىنا ەنگىزىلگەن، دەپ حابارلايدى قازاقپارات ءتىلشىسى.
اقنۇرايعا ۇستەل ويىنىن قۇراستىرۋ يدەياسى 6-سىنىپتا وقىپ جۇرگەندە كەلگەن.
سىنىپتاستارىنىڭ كوركەم شىعارما وقۋعا قىزىعۋشىلىعىنىڭ جوقتىعى، شىعارما مازمۇنى مەن ونداعى كەيىپكەرلەردى ەستە ساقتاۋ قيىندىعى، كوركەمدەگىش قۇرالداردى اجىراتا الماۋ سەكىلدى ماسەلەلەردى كورگەن كەزدە بۇل ماسەلەنى شەشۋدىڭ جولىن ويلاستىرعان.
كوركەم شىعارمالار نەگىزىندە قۇرىلعان ۇستەل ويىندارىن زەرتتەۋ بارىسىندا وقۋشى شەتەل ادەبيەتىنە سۇيەنە وتىرىپ جاسالعان ۇستەل ويىندارىنىڭ كوپ ەكەندىگىن، ال قازاق ادەبي شىعارمالارى نەگىزىندە قۇرىلعان ويىنداردىڭ جوقتىڭ قاسى ەكەنىن انىقتاعان.
وقۋشىنىڭ يدەياسىنا قازاق ءتىلى مەن ادەبيەتى ءپانىنىڭ مۇعالىمى، جوبانىڭ جەتەكشىسى سۇلەيمەنوۆا مەيرامگۇل مەيراش قىزى مەن ونەر ءپانىنىڭ مۇعالىمى جامەلوۆ قايىرجان جەڭىس ۇلى بىرلەسە قولداۋ كورسەتىپ، 6 ايدا ۇستەل ويىنىن قۇراستىرىپ شىعارعان.
ويىندا «كەيىپكەردى تانى»، «سۋرەت- سيۋجەت»، «وي زەرەك»، «ءسوز كوركەم» دەگەن ءارقايسىسى 20 كارتادان تۇراتىن جالپى سانى 80 كارتا بار.
ويىن كىلەمشەسىندەگى ويىنشىلاردىڭ ءجۇرۋ باعىتتارى ۇلتتىق ويۋ-ورنەك تۇرىندە بەرىلسە، ويىن ەلەمەنتتەرى قوبىز، تورسىق، دومبىرا، جىلقى سەكىلدى ۇلتتىق قۇندىلىقتارعا نەگىزدەلىپ جاسالعان.
اقنۇراي ۇستەل ويىنىنا اۆتورلىق قۇقىق العانىن ايتادى.
«قازاق ادەبي شىعارمالاردى ويىن ارقىلى مەڭگەرتۋدىڭ ناتيجەسى جوعارى، ويتكەنى ساباقتا جانە ءۇزىلىس كەزىندە ويناعان سايىن سىنىپتاستارىم شىعارمانى وتە جاقسى مەڭگەرىپ الدى»، - دەيدى اقنۇراي.
اقنۇراي الداعى ۋاقىتتا ويىن ەرەجەسىنە ازداعان وزگەرىس ەنگىزۋ ارقىلى ۇستەل ويىنىن تەلەفون ارقىلى ويناۋعا ىڭعايلى بولاتىن قوسىمشاعا اينالدىرۋدى كوزدەپ وتىر.