دەنساۋلىعىم سىر بەرسە، كولىگىم اۆتوماتتى تۇردە ءوشىپ قالادى - تاكسيست نۇرجان ارتىقوۆ

تۇركىستان. قازاقپارات- تۇركىستان وبلىسىندا ەكى اياعى كەسىلگەن ازامات تاكسيست بولىپ، تابىس تاۋىپ ءجۇر، دەپ حابارلايدى قازاقپارات ءتىلشىسى.

نۇرجان ارتىقوۆتى سارىاعاشتىق تۇرعىندار جاقسى تانيدى. تاكسيستتىك قىزمەتتى كاسىپ ەتكەن جاننىڭ جايدارى ءجۇزى جولاۋشىلاردىڭ ەسىندە جاتتالىپ قالعان. كولىگىنە مىنگەن كليەنتتەرگە دە كۇلكىلى اڭگىمەلەر ايتىپ، كوڭىلدەرىن كوتەرىپ وتىرادى. سوندىقتان بولار جەرگىلىكتى تۇرعىندار نۇرجان ارتىقوۆتىڭ كولىگىن الىستان كورگەننەن قول بۇلعاپ، توقتاتىپ الادى. الىس ساپارعا شىعاتىندار بولسا الدىن الا حابارلاسىپ، تاپسىرىس بەرەدى.

نۇرجاننىڭ ەكى اياعى جوق. كىشكەنە عانا تىرناقتىڭ جۇلىنعاندىعىنان، اۋرۋى اسقىنىپ، ەكى اياعىن كەسۋگە ءماجبۇر ەتكەن. العاشقىدا اياقسىز ءومىر ءسۇرۋ اۋىر بولعانىمەن، باسقا تۇسكەن قيىندىقتى قالايدا كوتەرۋگە تۋرا كەلدى.

«2014-2015 -جىلدارى بولاتىن. اياعىمداعى تىرناقتى جۇلعاننان ينفەكتسيا ءتۇسىپ، جاراسى جازىلماي قويدى. سودان، العاشقىدا اياقتى توبىقتان كەستى. كىشكەنە جارا - ۇلكەن ماسەلەگە اينالدى. ارادا بىرنەشە جىل وتكەندە اياعىمدى جوعارى بولىكتەن، كەيىننەن ەكىنشى اياعىمدى دا كەسۋگە الىپ كەلدى»- دەيدى ول.

ارنايى ارباعا تانىلعان ازامات العاشقىدا ۇيدە جاتتى. ءاربىر قيمىلى قوسىمشا كومەكتى قاجەت ەتەتىندىكتەن قوعامعا دا ءسىڭىسۋ قيىن بولدى. دەگەنمەن، توسەك تارتىپ جاتا بەرۋدى ار ساناعاندىقتان، قارجى تاۋىپ، وتباسىن قامتاماسىز ەتۋدى ارماندادى. سونداعى بار ويىنا كەلگەنى تاكسيست بولۋ ەدى. العا قويعان ماقساتى توسەكتەن تۇرعىزدى. قازىر ەكى اياقتىڭ جوقتىعىنا قاراماي ادام تاسىپ اقشا تاۋىپ ءجۇر.

«كولىگىمنىڭ قوزعالتقىشى اۆتومات. گاز بەن تەجەگىشىنە ارنايى تەمىر جالعاپ، قولمەن باسقارىلاتىن ەتىپ الدىم. باسقارۋ وڭاي. گاز بەرگەندە، تەجەگىش اۆتوماتتى تۇردە اجىراتىلادى. ال، تەجەگىشتى باسقاندا، گاز ازايادى. «باسقا تۇسكەن باسپاقشىل» - دەيدى عوي. ەگەر قاجەتتىلىك تۋسا، بارلىعىن دا ىستەۋگە بولادى ەكەن»- دەيدى ول.

جىگەرلى جان بۇگىنگى دەيىن 7 كولىكتى تىزگىندەگەن. قازىرگى ءمىنىپ جۇرگەنى 7 ورىندىق «toyota estima». تاكسيست بولىپ، تاپسىرىس قابىلداعان سوڭ، الىس جولعا دا شىعاتىن كەزدەرى كوپ. ونداي ساتتەرى كەرەك- جاراقتىڭ بارلىعىن قاسىنا الىپ الادى. كولىگى جولدا بۇزىلسا، جوندەۋ جۇمىستارى ءوز قولىنان كەلەدى. دوڭگەلەگى جارىلسا اۋىستىرىپ الادى. ەڭ باستىسى نۇرەكەڭ كولىكتى اسا ەپتىلىكپەن جۇرگىزەدى. جۇرگىزۋشىلىكتەگى 30 جىلدىڭ تاجىريبەسىنەن «جولدىڭ قاتەلىك جاساۋعا جول بەرمەيتىنىن» جاقسى بىلەدى. سوندىقتان بولار، كوپ جولاۋشىلار كولىككە مىنگەندە اياعىنىڭ جوقتىعىن بايقاماي دا قالادى.

«جولدا جۇرگەن سوڭ، جۇرگىزۋشىلەر ءبىر بىرىمىزگە كومەك كورسەتىپ تۇرامىز. بىردە قىزىلورداعا بارا جاتقان جولدا كولىگىمنىڭ ەكى دوڭگەلەگى بىردەن جارىلىپ قالدى. دەرەۋ ءتۇسىپ اۋىستىرىپ جاتىر ەدىم، وزگە كولىكتەگى جىگىتتەر كەلىپ كومەكتەسىپ جىبەردى. ال، الماتىعا بارا جاتقان جولدا 140-150 جىلدامدىقتى ۇستاپ وتىرعانمىن. كولىكتەگى جولاۋشى «اعا، گازدى باسساڭىزشى، باسساڭىزشى» دەپ قويماي قويدى. ولارعا اياعىمنىڭ جوق ەكەنىن ءتۇسىندىردىم. بىردەن توقتاتىپ، ەسىكتى اشىپ قارادى. سودان تىنىشتالدى»- دەيدى جىگەرلى جان.

نۇرەكەڭ بىلتىرعى جىلى قۇلاعىنا چيپ ورناتتى. ولدا كولىگىمەن تىكەلەي بايلانىستى. ياعني، جولدا كەلە جاتىپ دەنساۋلىعى ناشارلاپ، ەسىنەن تانىپ قالاتىن جاعداي بولسا، كولىك اۆتوماتتى تۇردە جولدىڭ شەتىنە شىعىپ، وزدىگىنەن توقتاپ قالادى. «بۇل قاۋىپسىزدىك ءۇشىن قاجەت» - دەيدى ول.

«ادام تاسىعاننان سوڭ، قاۋىپسىزدىك جاعىنا قاتتى قارايمىن. كليەنت جيناپ وتىرعاندا اياعىمنىڭ جوق ەكەنىن ءبىلىپ، كولىكتەن ءتۇسىپ قالاتىندار بار. مەن وعان ەشقاشان رەنجىمەيمىن. اللانىڭ بەرگەنىنە قاناعات ەتەمىن»- دەيدى ازامات.

نۇرجان ارتىقوۆتىڭ ءۇش ۇل، ەكى قىزى بار. جۇبايى بالا تاربيەسىمەن ۇيدە وتىر.

«اللا سىناقتى دا سۇيىكتى قۇلىنا بەرەدى ەكەن. مەن باقىتتى اداممىن. ۇل- قىزدارىم كومەكتەسۋگە جاراپ قالدى. جۇبايىم جاعدايىمدى جاساپ وتىر. تۇسىنىگى مول، اقىلدى ايەلمەن تابىستىرىپ، سانالى ۇرپاق بەرگەن اللاعا مىڭدا ءبىر شۇكىرشىلىك ەتەمىن»- دەيدى نۇرجان.

اۆتور:

قايرات زاينيشيەۆ