ورتالىق ازياداعى اسىل قازىنالى بەس ەل تۋرالى نە بىلەمىز - شەتەلدەگى قازاق باسپا ءسوزى

استانا. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

ورتالىق ازياداعى اسىل قازىنالى بەس ەل تۋرالى نە بىلەمىز - CNR

18-19-مامىر ارالىعىندا سيان قالاسىندا وتكەن «ورتالىق ازيا - قىتاي» سامميتىنە ورتا ازياداعى بەس مەملەكەتتىڭ باسشىلارى كەلدى. مىڭجىلدىق جىبەك جولى شىعىس پەن باتىستى وسى وڭىرلەر ارقىلى باسىپ وتەتىنى بەلگىلى. ورتالىق ازيا - «ءبىر بەلدەۋ، ءبىر جول» باعدارلاماسىنىڭ باستاۋ العان ايماعى. سىزدەر ورتالىق ازيا تۋرالى قانشالىقتى بىلەسىزدەر؟ ادەمى تابيعات كورىنىستەرى، تاماشا جىبەك جولى مادەنيەتى، زاماناۋي جانە ءساندى قالالار، تاڭ قالدىراتىن تاعامدار.. . كەلىڭىز، كورىكتى ورتالىق ازياعا تاماشا ساياحاتتى بىرگە باستايىق، دەپ جازادى قىتايدىڭ «ورتالىق حالىق راديوسى».

وسىلاي دەپ باستاعان قىتايدىق ب ا ق ورتا ازياداعى قازاقستان، وزبەكستان، قىرعىزستان، تاجىكستان، تۇركىمەنستان قاتارلى بەس مەملەكەتتى وقىرماندارىنا جەكە- جەكە تانىستىرىپ شىققان.

سونىڭ ىشىندە قىتايلىق باسىلىم ەلىمىز تۋرالى بولىمىنە «ازيا مەن ەۋروپانى ەندەي وتەتىن ەل قازاقستان» دەگەن تاقىرىپ قويعان.

قىتايلىق باسىلىم بۇل ماقالادا، قازاقستان - مىڭجىلدىق جىبەك جولىندا شىعىس پەن باتىستى بايلانىستىراتىنىن، بيىل قۇرىلعانىنا 10 جىل تولعان «ءبىر بەلدەۋ، ءبىر جول» باعدارلاماسىنىڭ باستاۋ العان ەلى ەكەنىن ايتادى.

سونداي- اق بۇل جازبادا، قازاقستان دەگەندە كوپتەگەن ادامداردىڭ ويىنا ايگىلى ءانشى ديماش ورالاتىنىن تىلگە تيەك ەتىلەدى.

بۇل ەل ازيا مەن ەۋروپانى كەسىپ جاتقان، باتىسىندا كاسپي تەڭىزىمەن، شىعىسىندا قىتايمەن شەكتەسەتىن الەمدەگى تەڭىزگە شىعا المايتىن ەڭ ۇلكەن مەملەكەت. قازاقستاننىڭ جەر كولەمى الەمدە توعىزىنشى ورىندا. كەڭ بايتاق قازاقستان باي جانە الۋان ءتۇرلى تابيعي لاندشافتتارعا يە. ۇلان- بايتاق قازاقستان الۋان ءتۇرلى جاراتىلىستىق بايلىقتارى بار ەل ەكەنى دە ايتىلادى.

«قازاقستاننىڭ اسەم تابيعاتىنان باسقا زاماناۋي جانە ءساندى جاعى دا بار. نەبارى جيىرما جىلدان استام ۋاقىت ىشىندە ەلورداسى استانا شاعىن قالادان زاماناۋي قالاعا اينالدى. استانادا وسى زامانعى ءساندى عيماراتتار بىرىنەن سوڭ ءبىرى بوي كوتەردى. ءارى ولاردىڭ كوپشىلىگىن الەمنىڭ ەڭ ۇزدىك ساۋلەتشىلەرى جوبالاعان. سولاردىڭ ىشىندە ەڭ ماڭىزدىسى - «حان شاتىر» ساۋدا ويىن ساۋىق ورتالىعى. ول الەمدەگى ەڭ ۇلكەن شاتىر تارىزدەس عيمارات. وندا جىلۋدى جاقسى سىڭىرەتىن ماتەريالدار قولدانىلادى. سىرتقى اۋا تەمپەراتۋراسى مينۋس 30°C بولسا دا، ءىشى جىلى بولىپ تۇرادى»، دەپ جازادى «ورتالىق حالىق راديوسى».

قىتايلىق باسىلىم بۇل جازبانى قازاقستاندىقتاردىڭ ۇلتتىق تاعامدارىن تانىستىرۋىمەن تۇيىندەگەن.

تىلەيحان المالىك ۇلى مەملەكەتتىك وردەنمەن ماراپاتتالدى - «Kaznews»

موڭعوليا پرەزيدەنتى ۋحنااگين ءحۇرەلسۇح ەنەرگەتيكا سالاسىنىڭ 100 جىلدىق مەرەيتويىنا وراي جارلىق شىعارىپ، ءبىرقاتار ازاماتتاردى مەملەكەتتىك جوعارعى اتاق، وردەن، مەدالدارمەن ماراپاتتادى.

پرەزيدەنت جارلىعى بويىنشا موڭعوليانىڭ ەنەرگەتيكالىق رەتتەۋ كوميتەتىنىڭ بۇرىنعى ءتوراعاسى تىلەيحان المالىك ۇلى «سۇحبااتار» وردەنىمەن ماراپاتتالدى، دەپ جازادى «Kaznews».

موڭعوليالىق ب ا ق- تىڭ دەرەگىنشە، تىلەيحان المالىك ۇلى 1955 -جىلى بايان- ولگيي ايماعىندا تۋعان. 1976 -جىلى موڭعوليا مەملەكەتتىك ۋنيۆەرسيتەتىن وندىرىستىك جىلۋمەن قامتاماسىز ەتۋ ينجەنەرى ماماندىعى، 1989 -جىلى ەكونوميكالىق كەشكى ۋنيۆەرسيتەتتى وندىرىستىك ەكونوميست ماماندىعى بويىنشا ءتامامداعان. تىلەيحان المالىك ۇلى موڭعوليا پارلامەنتىنە ەكى رەت سايلانعان دەپۋتات.

2008-2012 -جىلدارى موڭعوليا پارلامەنتىنىڭ الەۋمەتتىك ساياسات، ءبىلىم، مادەنيەت، عىلىم ماسەلەلەرى بويىنشا تۇراقتى كوميتەتىنىڭ باستىعى بولدى. 1991 -جىلى حالىق ريەۆوليۋتسيالىق 70 جىلدىق مەدالى، 1993 -جىلى ەنەرگەتيكا سالاسىنىڭ وزات قىزمەتكەرى، 2001 -جىلى حالىق ريەۆوليۋتسياسىنىڭ 80 جىلدىق مەدالى، 2005 -جىلى ەڭبەك قىزىل تۋ وردەنىمەن ماراپاتتالعان. 2014 -جىلى موڭعوليانىڭ «ونەركاسىپ سالاسىنا ەڭبەك سىڭىرگەن قايراتكەرى» اتاعىن العان.

قازاقستان ەكونوميكاسى 4 ايدا 5 پايىزعا ءوستى - «TRT»

قازاقستاندا پرەمەر- مينيستر ءاليحان سمايىلوۆتىڭ توراعالىعىمەن ۇكىمەت وتىرىسى ءوتىپ، جيىندا ەل ەكونوميكاسىنىڭ ءتورت ايدا 5 پايىزعا وسكەنى ايتىلدى، دەپ حابارلادى تۇركيا راديو تەليەۆيزيا پورتالى.

تۇركيالىق ب ا ق- تىڭ كەلتىرگەن مالىمەتىنشە، 2023 -جىلدىڭ قاڭتار- ناۋرىز كەزەڭىندە سىرتقى ساۋدا كولەمى 13,4 پايىزعا ءوسىپ، 32,7 ميلليارد دوللارعا جەتتى.

ايتا كەتۋ كەرەك، ق ر ەكونوميكا ءمينيسترى الىبەك قۋانتىروۆ قازاقستان ەكونوميكاسى بيىلعى 4 ايدا وتكەن جىلدىڭ قاڭتار- ءساۋىر ايلارىمەن سالىستىرعاندا 5 پايىزعا وسكەنىن مالىمدەگەن بولاتىن.

سونىمەن قاتار، مينيستر ەڭ جوعارى ءوسىم كورسەتكەن سالالاردىڭ قۇرىلىس، ساۋدا، اقپارات جانە بايلانىس سالالارى ەكەنىن، سونىمەن قاتار بارلىق نەگىزگى سالالاردا وڭ ديناميكا بايقالعانىن ايتقان.

يراننىڭ گۇلستان وبلىسىنىڭ ەكونوميكالىق بەلسەندىلەرى قازاقستاندا كەڭەستى - «Parstoday»

يراننىڭ سولتۇستىگىندەگى گۇلستان وبلىسىنىڭ ونەركاسىپ مەنەدجەرلەرى قازاقستانمەن بىرلەسكەن جوبالاردى جۇزەگە اسىرۋعا جانە ەكونوميكالىق قارىم- قاتىناستاردى دامىتۋعا دايىن ەكەندىكتەرىن مالىمدەدى، دەپ حابارلايدى «Parstoday» اقپارات اگەنتتىگى.

اتالعان اقپارات اگەنتتىگىنىڭ مالىمەتىنشە، گۇلستان وبلىسىنىڭ ازىق- تۇلىك جانە قۇرىلىس ونىمدەرى سالاسىنداعى جەكە سەكتور كومپانيالارىنىڭ ون ەكى مەنەدجەرىنەن قۇرالعان دەلەگاتسيا قازاقستاننىڭ الماتى قالاسىنا بارىپ، ءوزارا مۇمكىندىكتەرىمەن تانىستى. ولار الماتى اكىمدىگىنىڭ ينۆەستيتسيالار جونىندەگى ۆيتسە- پرەزيدەنتىمەن اڭگىمەلەستى.

الماتىداعى يير كونسۋلى ميلاد حەيرانديش تە قاتىسقان بۇل باسقوسۋدا ەكى ەل وكىلدەرى الدىمەن فيلم كورسەتۋ ارقىلى ءوز ەلدەرىندەگى ينۆەستيتسيانىڭ مۇمكىندىكتەرىن تانىستىردى.

گۇلستان وبلىسىنىڭ قازاقستانداعى ەكونوميكالىق دەلەگاتسياسىنىڭ باسشىسى ەحسان مالەك شاحكوۋي يران پرەسس اقپارات اگەنتتىگىنە سۇحبات بەرىپ، گۇلستان وبلىسىنىڭ قازاقستانمەن ەرەكشە ارىپتەستىك قارىم- قاتىناسى بار ەكەنىن جانە بۇل وبلىستا جەتى مىڭعا جۋىق قازاق تۇراتىنىن ايتقان.

تاشكەنتتە راحمەتوللا رايىمقۇلوۆتىڭ 110 جىلدىعىنا ارنالعان شارا ءوتتى - «ءو ز ا»

قازاق ادەبيەتىنىڭ كورنەكتى وكىلى، بەلگىلى جازۋشى، دراماتۋرگ، اۋدارماشى، قوعام قايراتكەرى راحمەتوللا رايىمقۇلوۆتىڭ تۋعانىنا 110 جىل تولۋىنا وراي تاشكەنت قالاسىنداعى وزبەكستان جازۋشىلار وداعىندا «قوس ۇلتتىڭ قىران تۇلعاسى» اتتى حالىقارالىق عىلىمي- پراكتيكالىق كونفەرەنتسيا ءوتتى.

بۇل تۋرالى وسى اپتادا «ءو ز ا» اقپاراتتىق اگەنتتىگى حابارلادى.

اتالعان باسىلىمنىڭ دەرەگىنشە، وزبەكستان جازۋشىلار وداعىنىڭ ءتوراعاسى، حالىق اقىنى سيروجيددين سايد اشقان سالتاناتتى شارادا، قازاقستان رەسپۋبليكاسى پرەزيدەنتىنىڭ كەڭەسشىسى، جازۋشى مالىك وتاربايەۆ قازاقستان پرەزيدەنتى قاسىم- جومارت توقايەۆتىڭ ارنايى قۇتتىقتاۋ حاتىن وقىپ بەردى. سونىمەن قاتار قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆ، ق ر مەملەكەت قايراتكەرى، جازۋشى- پۋبليتسيست ساۋىتبەك ابدۋراحمانوۆ، قالامگەردىڭ قىزى ق ر ونەر قايراتكەرى اقتوتى رايىمقۇلوۆا جانە باسقالار ەكى باۋىرلاس حالىق اراسىنداعى دوستىق قارىم- قاتىناستىڭ سوڭعى جىلدارى ودان ءارى دامىپ، جاڭا كەزەڭگە اياق باسقانىن اتاپ ءوتتى.

ايتا كەتەيىك، كورنەكتى قالامگەر راحمەتوللا رايىمقۇلوۆ 1913 -جىلى تاشكەنت وبلىسى، بوستاندىق اۋدانى، قاراماناس اۋىلىندا دۇنيەگە كەلگەن (1978 -جىلدىڭ 18 -ماۋسىمىندا دۇنيەدەن وتكەن).

وزبەكستاندىق باسىلىم بۇل جازبانىڭ سوڭىندا راحمەتوللا رايىمقۇلوۆتىڭ ەڭبەك جولىن، شىعارمالارىن، اتقارعان قىزمەتتەرىن تانىستىرعان.

اۆتور:

بەيسەن سۇلتان