ەۋروپادا، ا ق ش، رەسەي، قىتايدا قازاقتاردىڭ قۇرىلتايى وتەدى

استانا. قازاقپارات - ەتنيكالىق قازاقتار كوپ شوعىرلانعان الەمنىڭ بىرنەشە ەلىندە قۇرىلتاي وتەدى. بۇل تۋرالى «وتانداستار قورى» ك ە ا ق پرەزيدەنتى ابزال ساپاربەك ۇلى ايتىپ بەردى، دەپ حابارلايدى قازاقپارات ءتىلشىسى.

«شەتەلدەگى قازاق ۇيىمدارىنىڭ باسشىلارىمەن ءداستۇرلى كەزدەسۋلەرىمىز جالعاسىن تابادى. وسى رەتتە الداعى 26-28- مامىر كۇندەرى گەرمانيانىڭ كەلن قالاسىندا ەۋروپا قازاقتارىنىڭ ءداستۇرلى قۇرىلتايى بولادى. قۇرىلتاي شەڭبەرىندە العاش رەت قازاق جاستارىنىڭ باسقوسۋى وتەدى. ال، 9-10 ماۋسىمدا رەسەيدەگى قازاق ۇيىمدارىنىڭ باسشىلارى مەن بەلسەندىلەرى ماسكەۋدە باس قوسادى. وندا تۇرىپ جاتقان قازاق جاستارىمەن دە جينالىس وتكىزەمىز»، - دەدى ابزال ساپاربەك ۇلى تىلشىلەرگە بەرگەن سۇحباتىندا.

قور باسشىسىنىڭ ايتۋىنشا، بيىل شىلدە ايىنىڭ باسىندا موڭعولياداعى ۇلان باتىر مەن بايان ولگەيدە كىشى قۇرىلتاي وتەدى. سونداي- اق، ا ق ش پەن قىتايدا دا شارا وتكىزۋ جوسپاردا.

«كۇز ايلارىندا ا ق ش- تا تۇڭعىش رەت قازاقتار فورۋمىن وتكىزۋ جوسپارلانىپ وتىر. وعان قوسا، قىتايدا تۇرىپ جاتقان قانداستارىمىزبەن دە قاۋىشۋ جوسپارىمىزدا بار. بۇل جيىنداردىڭ قاي قالالاردا وتەتىنى ءالى ناقتىلانىپ جاتىر» ، - دەپ تولىقتىردى سپيكەر.

سونىمەن بىرگە، «وتانداستار قورى» بيىل رەسەيدەگى ۇلتتار ىستەرى جونىندەگى فەدەرالدىق اگەنتتىكپەن، قىتايداعى ارىپتەستەرىمەن ىنتىماقتاستىق تۋرالى مەموراندۋمعا قول قويۋدى جوسپارلاپ وتىر. بيىل مۇنداي كەلىسىمدەر ازەربايجان جانە وزبەكستان ەلدەرىمەن بەكىتىلگەن.

«ەل ىشىندە بيىل شەتەلدەگى بارلىق قازاق ۇيىمدارىنىڭ ءۇش كۇندىك سەمينار- فورۋمى وتەدى. سونىمەن بىرگە، پاۆلودار وبلىسىندا العاش رەت قازاق جاستارىنىڭ باسقوسۋى جوسپارلانعان. شىلدە ايىندا شەتەلدەگى 200 قازاق بالاسى بۋرابايداعى لاگەرگە جينالادى. سونداي- اق، بيىل تۇعىش رەت شەتەلدەگى قازاق اقىن- جازۋشىلارىنىڭ جانە شەتەلدەگى قازاقتار تۋرالى عىلىمي ەڭبەكتەردىڭ 10 كىتابى باسىلىپ شىعادى. كوميسسيا جازۋشىلار وداعىمەن بىرگە وتىنىمدەردى قاراستىرىپ جاتىر»، - دەدى ا. ساپاربەك ۇلى.

ءداستۇرلى ونلاين/وففلاين قازاق ءتىلى كۋرستارى دا جالعاسادى. تاعى ءبىر باستى جاڭالىق - بيىل شەتەلدەگى 10 ەلدە 20 ۇلتتىق ونەر جانە سپورت باعىتىندا كۋرستار اشىلادى. مۇنداعى ۇستازداردىڭ جالاقىسىن «وتانداستار قورى» تولەيدى.