قانداس مارتەبەسىن «ءبىر تەرەزە» قاعيداتى بويىنشا الۋعا بولادى

استانا. قازاقپارات - قانداس مارتەبەسىن بەرۋ ءتارتىبى وزگەرەدى. ەندى وتىنىمدەر قازاقستان ەلشىلىكتەرى ارقىلى «ءبىر تەرەزە» قاعيداتى بويىنشا قابىلدانادى، دەپ حابارلايدى قازاقپارات.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، جاڭا تەتىك ءبىرقاتار مەملەكەتتەردە پيلوتتىق رەجيمدە ىسكە اسىرىلۋدا. بۇل ەلىمىزگە كەلۋ، جۇمىس ورنى، تۇرعىن ءۇي بەرۋ مۇمكىندىكتەرى تۋرالى ماسەلەلەردى شەشۋگە جانە رەسپۋبليكا اۋماعىنا كىرمەي- اق قانداس مارتەبەسىن الۋعا مۇمكىندىك بەرەدى.

جاڭا ءتارتىپ پەن باسقا دا ءبىرقاتار شارالار مەملەكەت باسشىسى 2023 -جىلدىڭ 19-ساۋىرىندە قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنداعى اكىمشىلىك رەفورما ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ شەڭبەرىندە بەكىتىلدى.

قازىرگى ۋاقىتتا ەتنيكالىق قازاقتاردان وتىنىشتەردى قابىلداۋ بويىنشا جۇمىس ۆيزالىق رەجيم ەلدەرىندە (تۇرىكمەنستان، موڭعوليا، قىتاي، يران، اۋعانستان) ورنالاسقان ق ر سىرتقى ىستەر مينيسترلىگىنىڭ شەت ەلدەردەگى مەكەمەلەرىندە پيلوتتىق رەجيمدە جۇرگىزىلۋدە. كەيىنىرەك ەلشىلىكتەر ارقىلى وتىنىمدەردى قابىلداۋ ۆيزاسىز رەجيمى بار ەلدەردە دە جۇرگىزىلەتىن بولادى.

بۇدان باسقا، Enbek.kz پورتالى ارقىلى وسى پيلوتتىق جوبانى (قانداس مارتەبەسىن بەرۋ جانە قانداستاردى قابىلداۋدىڭ وڭىرلىك كۆوتاسىنا ەنگىزۋ جونىندەگى قىزمەتتەر) ىسكە اسىرۋ شەڭبەرىندە مەملەكەتتىك قىزمەتتەر كورسەتۋ كەزىندە مەملەكەتتىك ورگانداردىڭ ءوزارا ءىس- قيمىل الگوريتمى ەنگىزىلدى.

بۇگىنگى تاڭدا قازاقستان رەسپۋبليكاسىنىڭ شەت ەلدەردەگى مەكەمەلەرى ارقىلى شەتەلدە تۇراتىن ەتنيكالىق قازاقتاردان 771 (237 وتباسى) ءوتىنىش قابىلداندى.

سونداي- اق، مەملەكەت باسشىسىنىڭ تاپسىرماسىن ىسكە اسىرۋ شەڭبەرىندە ماڭعىستاۋدا وبلىس اكىمىنىڭ ورىنباسارىنىڭ باسشىلىعىمەن قانداستاردى جايعاستىرۋ جانە قابىلداۋ جونىندەگى ارنايى كوميسسيا قۇرىلدى، ول ەتنيكالىق قازاقتاردىڭ وڭىردە تۇرۋعا وتىنىشتەرىن دەربەس قارايدى.

تۇراقتى نەگىزدە جۇمىس ىستەيتىن وسىنداي كوميسسيالار الداعى ۋاقىتتا ەلىمىزدىڭ بارلىق وڭىرلەرىندە قۇرىلاتىن بولادى.

ەستەرىڭىزگە سالا كەتەيىك، ق ر الەۋمەتتىك كودەكسى جانە ق ر 2022-2027 -جىلدارعا ارنالعان كوشى- قون ساياساتىنىڭ جاڭا تۇجىرىمداماسى اياسىندا ەتنيكالىق كوشى- قوندى دامىتۋ جانە قولداۋ بويىنشا جاڭا زاڭنامالىق باستامالار ەنگىزىلدى.

ەتنيكالىق قازاقتار (باسقا ەلدەردىڭ ازاماتتارى) ءۇشىن العاش رەت «اتا جولى» كارتاسى ەنگىزىلەدى، ونىڭ ىشىندە، جوعارى دەڭگەيدەگى كاسىبي ماماندار نەمەسە تابىستى بيزنەسمەندەرگە ەلگە وڭايلاتىلعان كىرۋ مۇمكىندىگى قاراستىرىلعان.

سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ % 50- ى نەمەسە ءبىر وتباسىنا 4 ميلليون تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى.