د د ۇ قان ازدىق پەن كۇرەس باعدارلاماسىن جاساپ شىقتى
انەمياعا ۇشىراعانداردىڭ كوپشىلىگى تابىس دەڭگەيى ورتاشا جانە تومەن ەلدەردە تۇرادى، دەپ حابارلايدى قازاقپارات «ب ۇ ۇ جاڭالىقتار قىزمەتىنە» سىلتەمەمەن.
وسى اپتادا وڭتۇستىك افريكانىڭ كەيپتاۋنىندا وتكەن انالار مەن سابيلەردىڭ دەنساۋلىعىنا ارنالعان حالىقارالىق فورۋمدا د د ۇ انەمياعا شالدىعۋ دەڭگەيىن تومەندەتۋ بويىنشا العاشقى كەشەندى باعدارلاما باستادى.
انەميا، سونداي-اق، قان ازدىق دەپ اتالاتىن اۋرۋ - قانداعى گەموگلوبين مەن ەريتروتسيتتەردىڭ ازايۋىمەن بىرگە جۇرەتىن جانە وتتەگى تاسىمالدانۋىنىڭ بۇزىلۋىمەن جانە گيپوكسيانىڭ دامۋىمەن سيپاتتالاتىن سيندروم، ياعني ورگانيزمدەگى وتتەگىنىڭ تومەندەۋى.
انەميا دامۋىنىڭ ەڭ كوپ تاراعان سەبەپتەرىنىڭ ءبىرى - تەمىر تاپشىلىعى، ءبىراق انەميا ۇلكەن قان جوعالتۋ، تۇقىم قۋالايتىن بۇزىلۋلار، بۇيرەك نەمەسە باۋىر اۋرۋلارى، جۇقپالى جانە ونكولوگيالىق اۋرۋلارعا بايلانىستى بولۋى مۇمكىن.
«انەمياعا قارسى كۇرەس جۇمىستارىنىڭ باسىم بولىگى تەمىر تاپشىلىعىنىڭ الدىن الۋ جانە ونى ەمدەۋگە باعىتتالعان»، - دەيدى د د ۇ تاماقتانۋ جانە ازىق- تۇلىك قاۋىپسىزدىگى ماسەلەلەرى جونىندەگى دەپارتامەنت ديرەكتورى فرانچەسكو برانكا.
د د ۇ دۇرىس تاماقتانۋ، انەميانى ءدال جانە ۋاقتىلى انىقتاۋ، ۆيتاميندەر مەن ميكروەلەمەنتتەردى قابىلداۋ جانە حالىقتىڭ وسى ماسەلە تۋرالى حاباردارلىعىن ارتتىرۋ سياقتى فاكتورلاردىڭ ءرولىن اتاپ ءوتتى.
د د ۇ جاڭا باعدارلاماسى اياسىندا انەميانىڭ سەبەپتەرى مەن قاۋىپ فاكتورلارىن جويۋ ءۇشىن كەشەندى شارالار قابىلداۋدى ۇسىنادى.