ق ر ءى ءى م قىلمىستىق قۇقىقبۇزۋشىلىقتاردى تەرگەۋدىڭ جاڭا ستاندارتىن ەنگىزبەك

استانا. قازاقپارات - پوليتسيا قىزمەتىن سيفرلاندىرۋ جانە قاعازباستىلىقتان ارىلتۋ اياسىندا وتكەن جىلدىڭ جەلتوقسان ايىنان باستاپ اقمولا وبلىسى قوسشى قالاسىنىڭ پوليتسيا ءبولىمىنىڭ بازاسىندا «پوليتسيا تەرگەۋى» پيلوتتىق جوباسى ىسكە قوسىلدى.

ال بيىلعى 20-اقپانىنان باستاپ وسى جوبا ەلوردانىڭ «سارىارقا» اۋدانىنىڭ پوليتسيا باسقارماسىندا جۇزەگە اسىرىلىپ جاتىر، - دەپ حابارلايدى قازاقپارات Polisia.kz سايتىنا سىلتەمە جاساپ.

ايتا كەتۋ كەرەك، بۇل ۇساق جانە اۋىرلىعى ورتاشا تەرىس قىلىقتار بويىنشا ايقىن قىلمىستىق قۇقىق بۇزۋشىلىقتاردى تەرگەۋدىڭ جاڭا ستاندارتى. مۇندا ءبىرىڭعاي ەسەپ ءۇشىن بارلىق تەرگەۋ ارەكەتتەرىنە بەينەتىركەۋ جۇرگىزىلەدى. ول تەرگەۋدىڭ جەدەلدىگىن ارتتىرىپ، ازاماتتاردىڭ قۇقىقتارىن تەرىس پايدالانۋ مەن بۇزۋ تاۋەكەلدەرىن ازايتادى، دالەلدەردى بۇرمالاۋدان قورعايدى، تەرگەۋدىڭ وبەكتيۆتىلىگى مەن ساپاسىن ارتتىرادى.

قىزمەتكەرلەردىڭ وزدەرى ءۇشىن بۇل فورمات ىڭعايلى، ويتكەنى ول تەرگەۋ ارەكەتتەرى حاتتاماسىن جۇرگىزبەيدى، ياعني ۋاقىت ۇنەمدەيدى.

اتالعان باستامانىڭ نەگىزى 17-ناۋرىزدا مەملەكەت باسشىسى قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق سوت ءىسىن جۇرگىزۋ سالاسىنداعى ادام قۇقىقتارى، جازانى ورىنداۋ، سونداي-اق ازاپتاۋ مەن باسقا دا قاتىگەز، ادامگەرشىلىككە جاتپايتىن نەمەسە ءقادىر- قاسيەتتى قورلايتىن قارىم-قاتىناس تۇرلەرىنىڭ الدىن الۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ شەڭبەرىندە تەرگەۋشىنىڭ قالاۋى بويىنشا قىسقاشا حاتتاما جاساۋدى كوزدەيتىن زاڭنامالىق تۇزەتۋ ارقىلى ىسكە اسىرىلدى.