پەتروپاۆلداعى سەپاراتيزم ءىسى: قازاقستان رەسپۋبليكاسىن ىدىراتۋدى ناسيحاتتاۋ بەلگىلەرىن انىقتادى

استانا. قازاقپارات - سەپاراتيزم بابىمەن تەرگەلىپ جاتقان پەتروپاۆل قالاسىنىڭ ءۇش تۇرعىنىنىڭ مالىمدەمەسىندە «قازاقستاننىڭ اۋماقتىق تۇتاستىعىن بۇزۋدى ناسيحاتتاۋ» بەلگىلەرى بار ەكەنى انىقتالدى.

پسيحولوگيالىق- فيلولوگيالىق ساراپتاما ناتيجەسى تۋرالى باس پروكۋرور بەرىك اسىلوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتتى، دەپ حابارلايدى قازاقپارات ءتىلشىسى.

«2023 -جىلعى 30-ناۋرىزدا ۇلتتىق قاۋىپسىزدىك كوميتەتىنىڭ سولتۇستىك قازاقستان وبلىسى بويىنشا دەپارتامەنتى «پەتروپاۆل قالاسى ەڭبەكشىلەرىنىڭ حالىق كەڭەسى» قۇرىلعانى جونىندەگى ۆيدەونى الەۋمەتتىك جەلىلەردە ورنالاستىرۋ فاكتىسى بويىنشا ق ر قىلمىستىق كودەكسىنىڭ 180-بابىنىڭ 2-بولىگىمەن (سەپاراتيستىك قىزمەت) سوتقا دەيىنگى تەرگەپ- تەكسەرۋ باستاعان. سول كۇنى قۇقىق قورعاۋ جانە ارنايى مەملەكەتتىك ورگانداردىڭ تاجىريبەلى قىزمەتكەرلەرىنەن ۆەدومستۆوارالىق جەدەل- تەرگەۋ توبى قۇرىلدى. ءىس بويىنشا پروتسەسس پروكۋرورلارى تاعايىندالدى. سوتقا دەيىنگى تەرگەپ- تەكسەرۋ شەڭبەرىندە جەدەل- تەرگەۋ ءىس- شارالارى جۇرگىزىلۋدە. الىنعان ماتەريالدار بويىنشا سوت پسيحولوگيالىق- فيلولوگيالىق ساراپتاماسى جۇرگىزىلدى. ونىڭ قورىتىندىسى بويىنشا ماتەريالداردا قازاقستان رەسپۋبليكاسىن ىدىراتۋدى ناسيحاتتاۋ، مەملەكەت قاۋىپسىزدىگىنە نۇقسان كەلتىرۋ، ونىڭ اۋماعىنىڭ تۇتاستىعى مەن بىرلىگىن بۇزۋدى ناسيحاتتاۋ بەلگىلەرى بار»، - دەپ جازىلعان جاۋاپتا.

سونداي- اق، باس پروكۋرور قىلمىستىق ءىس بويىنشا 3 فيگۋرانتقا قاتىستى سولتۇستىك قازاقستان وبلىسىنىڭ مامانداندىرىلعان تەرگەۋ سوتىنىڭ 2023 -جىلعى 20-ساۋىردەگى قاۋلىسىمەن 2 اي مەرزىمگە «كۇزەتپەن ۇستاۋ تۇرىندەگى» بۇلتارتپاۋ شاراسى سانكسيالانعانىن ەسكە سالدى.

اۆتور: ەسىمجان ناقتىباي