استانادا بالاباقشا اقىسى كوتەرىلۋى مۇمكىن

استانا. قازاقپارات - ەلوردادا مەملەكەتتىك بالاباقشالارعا اتا-انا تولەيتىن تاماق اقىسىن ءوسىرۋ ۇسىنىلدى. باعانى كوتەرۋدىڭ سەبەبىن استانا قالاسى ءبىلىم باسقارماسىنىڭ باسشىسى قاسىمحان سەنعازىيەۆ ءتۇسىندىرىپ بەردى، دەپ حابارلايدى قازاقپارات ءتىلشىسى.

«بالاباقشالاردىڭ اس ءمازىرى تاماقتانۋ ينستيتۋتىمەن بىرلەسە ازىرلەنىپ، بەكىتىلگەن. ول بىلتىر ازىرلەنگەن. وسى ورايدا، مەملەكەتتىك بالاباقشالاردا اتا-انالار تولەيتىن تاماق اقىسىن جەكەمەنشىك بالاباقشالارمەن تەڭەستىرىپ، 20800 تەڭگەگە ۇلعايتۋ تۋرالى ۇسىنىس بار. ستاتيستيكاعا سۇيەنسەك، قولدانىستاعى اس ءمازىرى بويىنشا 2-3 جاستاعى بالالارعا ساتىپ الىناتىن ازىق-تۇلىككە جۇمسالاتىن قاراجات - 18837 تەڭگە. ال، 3-6 جاستاعى بالالار تاماعىنا 20800 تەڭگە جۇمسالادى. دەگەنمەن، مەملەكەتتىك ساتىپ الۋ پورتالىندا باعالار بۇدان جوعارى»، - دەدى قاسىمحان سەنعازىيەۆ ەلوردا ءماسليحاتىنىڭ وتىرىسىندا.

ءبىلىم باسقارماسى باسشىسىنىڭ مالىمدەۋىنشە، تاماق اقىسى بويىنشا باسقا وڭىرلەرمەن سالىستىرۋ جۇرگىزىلگەن.

«ايتار بولساق، الماتىدا 25 مىڭ تەڭگە، قاراعاندىدا 17 مىڭ تەڭگە، اقتوبەدە 16800 تەڭگە جانە تۇركىستان قالاسىندا 13633 تەڭگە. بيىل قىركۇيەك ايىنان باستاپ ءبىز مەملەكەتتىك جانە جەكەمەنشىك بالاباقشاعا باراتىن تۇرمىسى تومەن وتباسىلاردىڭ بالالارىن تەگىن تاماقپەن قامتۋىمىز قاجەت»، - دەيدى ول.

ايتا كەتسەك، استاناداعى بالاباقشا تاربيەشىلەرىنىڭ %32 ىندا ارنايى ءبىلىم جوق.