اكىم استاناداعى ل ر ت جوباسىن قاشان اياقتاۋدى جوسپارلاپ وتىرعانىن ايتتى
بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە ەلوردا اكىمى جەڭىس قاسىمبەك ايتتى، دەپ حابارلايدى قازاقپارات ءتىلشىسى.
«بيىل قالا ىشىندە جانە ەلوردانىڭ اينالاسىنداعى جاسىل بەلدەۋدە ميلليونعا جۋىق جاسىل جەلەك وتىرعىزۋدى جوسپارلاپ وتىرمىز. جىل باسىنان بەرى 733 مىڭ شارشى مەتر تۇرعىن ءۇي سالىندى. بۇل وتكەن جىلدىڭ ءتيىستى كەزەڭىمەن سالىستىرعاندا 22 پايىزعا ارتىق. جىل سوڭىنا دەيىن بارلىعى ءۇش ميلليوننان استام شارشى مەتر تۇرعىن ءۇيدى پايدالانۋعا بەرۋدى جوسپارلاپ وتىرمىز. بۇل - 40 مىڭنان استام پاتەر، ونىڭ ىشىندە حالىقتىڭ الەۋمەتتىك وسال توپتارى ءۇشىن مەملەكەت بولگەن - 6 مىڭ پاتەر بار. سونىمەن قاتار، بيىل «نۇرلى جەر» باعدارلاماسىنىڭ ەكىنشى كەزەڭى اياسىندا سالىنىپ جاتقان بارلىق پروبلەمالىق ۇلەستىك نىسانداردى اياقتاپ، پايدالانۋعا بەرۋدى جوسپارلاپ وتىرمىز»، - دەدى قالا باسشىسى.
ونىڭ اتاپ وتۋىنشە، بيىل ناۋرىزدا قالالىق جاڭعىرتۋ باعدارلاماسى 2030 -جىلعا دەيىن وزەكتەندىرىلدى، ناتيجەسىندە 206 اپاتتى ءۇيدى كوشىرۋ جوسپارلانۋدا.
«LRT-نىڭ ءبىرىنشى ىسكە قوسۋ كەشەنىنىڭ قۇرىلىس جۇمىستارى قايتا جانداندى. جوبانى 2 جىلدىڭ ىشىندە اياقتاۋدى جوسپارلاپ وتىرمىز. سونىمەن قاتار بيىل ۇزىندىعى 55 شاقىرىم 72 كوشەگە قۇرىلىس-جوندەۋ جۇمىستارىن جۇرگىزەمىز جانە تاۋەلسىزدىك كوپىرى قۇرىلىسىن اياقتايمىز»، - دەدى جەڭىس قاسىمبەك.