بۇگىن قاسيەتتى قادىر ءتۇنى

استانا. قازاقپارات - قادىر ءتۇنى - مۇسىلماندار ءۇشىن ماڭىزدى ءارى قاسيەتتى كەزەڭدەردىڭ ءبىرى.

قازاقستان مۇسىلماندارى ءدىني باسقارماسى بيىلعى قادىر ءتۇنىن ءساۋىردىڭ 17 نەن 18 نە قاراعان تۇنىنە بەلگىلەدى، دەپ حابارلايدى قازاقپارات ءتىلشىسى.

قۇراندا قادىر ءتۇنىنىڭ ناقتى ۋاقىتى ايتىلمايدى، ءال-بۇحاري حاديسىندە رامازان ايىنىڭ سوڭعى 10 كۇنىندەگى تاق تۇندەردىڭ ءبىرى ەكەنى ايتىلعان. كوپشىلىگى مۇنى ورازانىڭ 27-ءتۇنى دەپ سانايدى.

«قادىر ءتۇنى - بەرەكەلى رامازان ايىندا كەلەتىن قاسيەتتى ءتۇن. رامازان ايىنىڭ سوڭعى ون ءتۇنى مۇسىلمان ءۇشىن وتە ماڭىزدى. سەبەبى قادىر تۇنىندە قاسيەتتى قۇران كارىم تۇسە باستادى. سوندىقتان يسلام دىنىندە بۇل ءتۇن ەرەكشە باعالانادى. قۇران كارىمدە «قادىر» سۇرەسى بار. وسىنىڭ ءوزى- اق بۇل ءتۇننىڭ اسا ارداقتى ەكەنىنەن حابار بەرەدى»، - دەپ جازىلعان ق م د ب سايتىندا.

«قادىر» - اراب ءسوزى. تىلدىك ماعىناسى قادىرلى، قاسيەتتى، ولشەممەن بەكىتىلگەن، ارتىق- كەمى جوق، دۇرىس دەگەن ماعىنالارعا سايادى. ال شاريعي تەرميندىك ماعىناسىنا «ءبىر جىلدا بولاتىن ىستەردى بەلگىلەپ، سونىڭ جازىلۋىنا اللا تاعالانىڭ ۇكىم بەرەتىن ءتۇنى»، - دەپ انىقتاما بەرىلگەن.

قادىر ءتۇنىنىڭ بىرنەشە بەلگىسى بار. عۇلامالاردىڭ ايتۋىنشا، قادىر ءتۇنىنىڭ بەلگىلەرى ەكى توپقا بولىنەدى. ءبىرىنشىسى، ۋاقىتىندا (ياعني سول ءتۇنى) بىلىنەتىن بەلگىلەر. وعان سول ءتۇننىڭ اشىق، اي ساۋلەسىنىڭ جارىق بولۋى؛ جۇرەكتىڭ تىنىشتىعى، ۋايىم- قايعىعا بەرىلمەي تىنىشتىقتى سەزىنۋى؛ ادامعا جاعىمدى سامال جەلدىڭ ەسۋى؛ سۋىق تا، ىستىق تا ەمەس قولايلى اۋا رايىنىڭ بولۋى جاتادى. ەكىنشىسى - تاڭ اتقاندا بىلىنەتىن بەلگى. بۇعان كۇننىڭ ساۋلەسىز قىزارىپ شىعۋى جاتادى.

قادىر تۇنىندە قۇلشىلىقتاردى كوبەيتۋگە، قۇراندى كوبىرەك وقۋعا، دۇعا-تىلەكتەر جاساۋعا كەڭەس بەرىلەدى.

ايتا كەتەيىك، بيىلعى رامازان ايى 23-ناۋرىزدا باستالدى. 21-ساۋىردە مۇسىلماندار ورازا ايت مەرەكەسىن اتاپ وتەدى. بۇل داتالاردى قازاقستاننىڭ مۇسىلماندار ءدىني باسقارماسى ورتالىق ازيا ەلدەرىنىڭ مۇفتيلەرىمەن، ءپاتۋا سالاسىنا جاۋاپتى عالىمدارمەن كەڭەسىپ، سونداي- اق عىلىمي زەرتتەۋلەردىڭ ناتيجەلەرىن ەسكەرە وتىرىپ بەلگىلەگەن.

بيىلعى ءپىتىر ساداقاسى جان باسىنا 535 تەڭگە بولىپ بەكىتىلدى. ءپىتىر ساداقاسى مولشەرى ەلىمىز بويىنشا ەكى كەلى ۇننىڭ ورتاق باعاسى نەگىزىندە بەلگىلەندى. ءپىتىر ساداقاسىن قۇرما، مەيىز باعاسىمەن بەرۋگە بولادى.

بۇعان دەيىن دارىگەرلەر ورازاداعى تاماقتانۋ جونىندە اقىل-كەڭەس بەرگەن ەدى.