لوندوندا قازاقستاندىق ەلەكتروندىق وقۋلىقتاردىڭ پلاتفورماسى تانىستىرىلدى

None
استانا. قازاقپارات - ەلەكتروندىق وقۋلىقتاردىڭ TopIQ قازاقستاندىق پلاتفورماسى بۇكىلالەمدىك بايقاۋدا ۇزدىك دەپ تانىلىپ، ەكىنشى ورىندى يەلەنگەن بولاتىن.

ستارتاپ جوبا مەكتەپكە اۋىر سومكە تاسىماي، كىتاپتا بار بۇكىل اقپاراتتى ونلاين كورۋگە كومەكتەسەدى. يدەيا اۆتورلارى لوندوندا وتكەن ءبىلىم بەرۋ تەحنولوگيالارىنىڭ حالىقارالىق مامانداندىرىلعان كورمەسىنە قاتىسىپ، تۇساۋكەسەرىن وتكىزدى، دەپ حابارلايدى قازاقپارات ءتىلشىسى.

Bett Show - 35 مىڭنان استام وقىتۋشى مەن ءبىلىم سالاسىنىڭ ماماندارىن بىرىكتىرەتىن دۇنيەجۇزىلىك كورمە. جينالعاندار جاڭا تەحنولوگيالارمەن جانە يننوۆاتسيالارمەن تانىسىپ، وزەكتى ماسەلەلەردىڭ شەشىمىن ىزدەيدى. شارادا العاشقى قازاقستاندىق پلاتفورما TopIQ ەلەكتروندىق وقۋلىعىنىڭ تۇساۋى كەسىلدى.

«حالىقارالىق ارەناعا وتاندىق ونىمىمىزبەن شىققانىمىزعا قۋانىشتىمىز. بۇدان دا جوعارى بەلەستەردى باعىندىرىپ، قازاقستاندى جاقسى قىرىنان تانىتا بەرەمىز دەگەن ۇمىتتەمىز»، دەيدى ستارتاپ جوبانى شىعارعان «الماتى كىتاپ باسپاسىنىڭ» وكىلى انەليا باتالوۆا.

TopIQ ەلەكتروندى وقۋلىقتارى قازاقستاندا تيىمدىلىگىن دالەلدەپ ۇلگەردى. اسىرەسە، پاندەميا كەزىندە. وقۋشىلار، مۇعالىمدەر جانە اتا- انالار پلاتفورمانى قولدانۋ وتە قولايلى دەپ تاپتى. وتاندىق ستارتاپ جوبانى شەتەلدىك ساراپشىلار دا قۇپتاپ وتىر.

«ۇسىنعان ونىمدەرىنە قاراپ، جەتىستىككە جەتۋگە تولىق مۇمكىندىكتەرى بار دەر ەدىم»، دەيدى يزرايلدىك IT ساراپشى امي مويال.

«مەنىڭشە، جوبا ءسوزسىز تابىستى بولادى. ويتكەنى ول زامان تالابىنا جاۋاپ بەرەدى»، دەيدى پولشالىق IT ساراپشى ميروتسلاۆ سيزدىن.

باسپا وكىلدەرىن قازاقستاننىڭ ۇلىبريتانياداعى ەلشىسى ماعجان ءىلياسوۆ قابىلداپ، الەمدىك نارىققا باعىت العان جوباعا ساتتىلىك تىلەدى. قوناقتار ەلشىلىك كىتاپحاناسىنا جاڭادان شىققان ءتول ءونىمىن تارتۋ ەتتى.

سوڭعى جاڭالىقتار