باس ءمۇفتي الماتىدا زيالى قاۋىم وكىلدەرىنە اۋىزاشار بەردى
2 ءساۋىر, 11:17

باس ءمۇفتي الماتىدا زيالى قاۋىم وكىلدەرىنە اۋىزاشار بەردى

الماتى. قازاقپارات - قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى الماتىدا زيالى قاۋىم وكىلدەرىنە، ءتۇرلى سالا قىزمەتكەرلەرىنە، سونداي-اق قارتتار جانە بالالار ۇيىندەگى جاندارعا ارنايى اۋىزاشار بەردى.

بۇل تۋرالى ءدىني باسقارماسىنىڭ باسپا ءسوز حاتشىسى اعابەك قونارباي ۇلى Facebook پاراقشاسىندا جازدى، دەپ حابارلايدى قازاقپارات ءتىلشىسى.

باس ءمۇفتي اۋىزاشاردا جۇرتتى رامازان ايىنىڭ كەلۋىمەن قۇتتىقتاپ، ساۋاپتى امالداردى جاساۋعا شاقىردى.

«بەرەكەلى ايدا كوبىرەك ساۋاپتى امال جاساۋعا اسىعايىق. اتا-انامىزدىڭ، قازىنالى قارتتارىمىزدىڭ دۇعاسى مەن العىسىن الۋعا تىرىسايىق. مۇمكىندىككە قاراي مۇقتاج جاندارعا قول ۇشىن بەرىپ، ناۋقاستىڭ كوڭىلىن سۇراپ، ساۋاپ الايىق»، - دەدى ناۋرىزباي قاجى تاعان ۇلى.

اعابەك قونارباي ۇلىنىڭ مالىمەتىنشە، ءوز كەزەگىندە قۇتتىقتاۋ ءسوز كەزەگىن العان اقساقالدار مەن زيالى قاۋىم وكىلدەرى باس مۇفتيگە العىس ءبىلدىرىپ، ءدىني باسقارمانىڭ يگى باستامالارىنا ساتتىلىك تىلەدى.

«اۋىزاشار داستارقانىندا تەرمەلەر ورىندالىپ، جاس تالانتتاردان قۇرالعان ءبىر توپ جىگىتتەر زاماناۋي ءداستۇر ۇردىسىمەن جاراپازان جىرىن ايتتى. سونىمەن قاتار باس ءمۇفتي ناۋرىزباي قاجى تاعان ۇلى اقساقالدار مەن اق جاۋلىقتى انالارعا جانە بالالارعا ارنايى رامازان سىيىن تابىستادى»، - دەپ جازدى اعابەك قونارباي ۇلى.


جاڭالىقتار