فۋتبول: «قايسار» العاشقى جەڭىسىنە قول جەتكىزدى
ءتورتىنشى تۋردىڭ العاشقى ويىنىندا اقتاۋدىڭ «كاسپيي» كومانداسى قىزىلوردانىڭ «قايسارى» كەزدەستى. اقتاۋداعى ستاديوننىڭ دايىن بولماۋىنا بايلانىستى ويىن الماتى قالاسىنداعى «جاس قىران» ستاديونىندا وتكىزىلدى.
قازىرگە دەيىن كوماندالار تۋرنير كەستەسىندە تومەنگى ورىنداردا كەلە جاتقان ەدى. اقتاۋلىق ۇجىم ءۇش تۋردا بىردە-ءبىر ۇپايعا قول جەتكىزە العان جوق. ال قىزىلوردالىق كلۋبتىڭ ەنشىسىندە نەبارى ءبىر عانا ۇپاي بولدى.
ويىن باسىنان قوس كوماندا بىردەن شابۋىلعا كوبىرەك شىعۋعا كوڭىل ءبولدى. كوپ ساتتە «قايسار» ويىنشىلارىنىڭ بەلسەندىلىگى بايقالدى. ناتيجەسىندە ولاردىڭ قاتارىنان 27، 32-مينۋتتاردا ۆاسيلي سوۆپەل ەكى مارتە مەرگەندىك تانىتتى.
ويىننىڭ 54-مينۋتىندا قىزىلوردالىق كلۋبتان باقداۋلەت زۋلفيكاروۆ ەسەپتى ۇستەمەلەي ءتۇستى. ال 63-مينۋتتا «كاسپي» ساپىنان الەكسەي زالەسكي پەنالتيدەن ءمۇلت كەتكەن جوق.
وسىلايشا «قايسار» قارسىلاسىنان 3:1 ەسەبىمەن باسىم ءتۇسىپ، بيىلعى بىرىنشىلىكتەگى العاشقى جەڭىسىنە قول جەتكىزدى. تۋرنير كەستەسىندە ولار سەگىزىنشى ورىنعا كوتەرىلسە، اقتاۋلىق كلۋب سوڭعى ورىنعا سىرعىدى.
ەندى ءتورتىنشى تۋردا بۇگىن 16:00 دە «شاحتەر» (قاراعاندى) مەن «قايرات» (الماتى) كەزدەسسە، 18:00 دە «اقسۋ» (پاۆلودار وبلىسى) مەن «ماقتارال» (تۇركىستان وبلىسى) ويىنى بەلگىلەنگەن.
ال 2- ساۋىردە «جەتىسۋ» مەن «توبىل»، «اقتوبە» مەن «قىزىلجار»، «اتىراۋ» مەن «وقجەتپەس»، «استانا» مەن «ورداباسى» وينايدى.