بانكروتتىققا بەرگەن ءوتىنىشىڭىز قابىلدانباسا نە ىستەۋ كەرەك
بۇل جايىندا قارجى ۆيتسە-ءمينيسترى ەرجان ءبىرجانوۆ ءمالىم ەتتى، دەپ حابارلايدى قازاقپارات ءتىلشىسى.
«الدىمەن بانك الدىنداعى قارىزى، ياعني نەسيەنى وتەۋ بويىنشا سول بانككە، ميكروقارجى ۇيىمى نەمەسە كوللەكتورلىك اگەنتتىككە جۇگىنگەن ءجون. كليەنتتىڭ اتىندا جىلجىمايتىن مۇلىك بولعان جاعدايدا حالىققا قىزمەت كورسەتۋ ورتالىعى نەمەسە ەلەكتروندى ۇكىمەت پورتالى ارقىلى ادىلەت ورگاندارىنا ءوتىنىش بىلدىرە الادى»، - دەدى ەرجان ءبىرجانوۆ و ك ق- دە وتكەن بريفينگىدە.
ونىڭ مالىمدەۋىنشە، بانكروتتىقتى راسىمدەۋ بارىسىندا اۆتوكولىك بويىنشا ماسەلە تۋىنداسا ىشكى ىستەر مينيسترلىگىنىڭ اۋماقتىق بولىمشەلەرىنە نەمەسە مامانداندىرىلعان حالىققا قىزمەت كورسەتۋ ورتالىعىنا حابارلاسۋ قاجەت.
«بانكروت مارتەبەسىن تاعايىنداۋدا جەر ۋچاسكەسىنىڭ بولۋى، ءتورت تۇلىك مالى جانە ارنايى تەحنيكاسى كەدەرگى كەلتىرسە، ماسەلەنى جەرگىلىكتى اكىمدىك ارقىلى شەشۋ مۇمكىندىگى بار. ال كليەنتتىڭ جەكە كاسىبى بارى انىقتالسا، مەملەكەتتىك كىرىستەر ورگانىنا جۇگىنگەن ابزال»، - دەيدى مينيستر ورىنباسارى.
ەسكە سالساق، 3- ناۋرىزدا ەلىمىزدە بانكروتتىققا ءوتىنىم قابىلداۋ باستالدى.
ەرجان ءبىرجانوۆ كەلتىرگەن ستاتيستيكاعا سايكەس، بۇگىنگى جاعداي بويىنشا 34 مىڭنان استام قازاقستاندىق ءوزىن بانكروت دەپ جاريالاۋعا ءوتىنىش بەرگەن.
سونداي-اق، بريفينگ بارىسىندا 7 مىڭنان اسا ازاماتتىڭ بانكروتتىققا بەرگەن ءوتىنىشى قاناعاتتاندىرىلماعانى ايتىلدى.
ودان بولەك، ءوزىن بانكروت دەپ جاريالاعاندار 5 جىل بويى نەسيە الا المايدى.