بانكروت مارتەبەسىن الۋدىڭ قانداي زاڭدى جولدارى بار

استانا. قازاقپارات - قارجى مينيسترلىگى تۇلعالاردىڭ بانكروت رەتىندە راسىمدەۋ بويىنشا قارجىلىق كومەك الۋدىڭ زاڭدى جولىن ءتۇسىندىردى، دەپ حابارلايدى قازاقپارات ءتىلشىسى.

«كليەنتتەرگە ولاردىڭ قاتىسۋىنسىز بانك الدىنداعى قارىزىن جويۋعا ۋادە بەرەتىن حابارلاندىرۋلار بار. ءتىپتى بانكروت مارتەبەسىن الىپ بەرەمىز دەۋشىلەر دە بار. ارينە، بۇل دۇرىس ەمەس، شىندىققا جاناسپايدى. بوگدە ادامدار بانكروت مارتەبەسىن الۋعا كەپىلدىك بەرە المايدى. بۇل جەردە الاياقتىقتىڭ بەلگىسى بار»، - دەدى قارجى ءمينيسترىنىڭ ورىنباسارى ەرجان ءبىرجانوۆ و ك ق- دە وتكەن بريفينگىدە.

سونىمەن قاتار، ۆيتسە-مينيستر بانكروت مارتەبەسىن راسىمدەۋدە زاڭدى تۇلعالارعا جۇگىنۋدىڭ بولاتىندىعىن ايتتى.

«جەكە تۇلعالاردىڭ بانكروتتىعى تۋرالى» زاڭ اياسىندا قارجى باسقارۋشىلارى قاراستىرىلعان. ولار بانكروتتىق راسىمىنە كومەكتەسە الادى، بۇل زاڭمەن رەتتەلگەن. سول سياقتى زاڭدا اتالعان قىزمەتى ءۇشىن تومەنگى ايلىق جالاقىعا سايكەس تولەم كوزدەلگەن. ەگەر ءسىز قارجى باسقارۋشىسىن جالداساڭىز، وعان 70 مىڭ تەڭگە كولەمىندە تولەيسىز، ودان كوپ ەمەس. تاعى ءبىر جايت، ەگەر كليەنت الەۋمەتتىك وسال توپقا جاتاتىن بولسا، قارجى باسقارۋشىسىنىڭ قىزمەتىن بيۋدجەت ەسەبىنەن وتەۋدى قاراستىردىق. بۇگىندە 170-كە جۋىق مامان قارجى مەنەدجەرى رەتىندە تىركەلدى. بانكروتتىق بويىنشا بىلىكتى كومەك الۋ ءۇشىن سولارعا جۇگىنۋگە بولادى»، - دەيدى مينيستر ورىنباسارى.

ايتا كەتسەك، بۇگىنگى جاعداي بويىنشا 34 مىڭنان استام قازاقستاندىق ءوزىن بانكروت دەپ جاريالاۋعا ءوتىنىش بەرگەن.