ەلەنا رىباكينانىڭ مايامي فينالىنداعى قارسىلاسى انىقتالدى

استانا. قازاقپارات - قازاقستاننىڭ ءبىرىنشى، الەمنىڭ 7-راكەتكاسى ەلەنا رىباكينانىڭ مايامي WTA 1000 تۋرنيرىنىڭ فينالىنداعى قارسىلاسى انىقتالدى، دەپ حابارلايدى قازاقپارات ءتىلشىسى.

جارتىلاي فينالدا الەمنىڭ 12-راكەتكاسى، چەحيالىق پەترا كۆيتوۆا مەن دۇنيەجۇزىلىك رەيتينگىدە 74-ورىندا تۇرعان رۋمىنيالىق سورانا كىرستيا شەبەرلىك بايقاستى.

ءبىرىنشى پارتيادا رۋمىنيالىق تەننيسشى 5:2 ەسەبىمەن الدا تۇرعانىمەن، قاتارىنان بەس گەيمدە ۇتىلىپ قالدى - 7:5.

ەكىنشى سەتتە چەحيالىق سپورتشى 6:4 ەسەبىمەن باسىم ءتۇستى. 1 ساعات 41 مينۋتقا سوزىلعان باسەكە بارىسىندا پ. كۆيتوۆا 7 ەيس جاساپ، 7 برەيك-پوينتتىڭ ۇشەۋىن پايدالاندى. قارسىلاسى 4 ەيس، 1 برەيكتەن (5 برەيك-پوينت) اسا العان جوق.

وسىلايشا، مايامي ماستەرس جارىسىنىڭ فينالىندا ەلەنا رىباكينا مەن پەترا كۆيتوۆا باس جۇلدەنى ساراپقا سالاتىن بولدى. ولار بۇعان دەيىن ەكى رەت كەزدەسكەن، ەسەپ - 1:1. وتكەن جىلى وستراۆا (چەحيا) دوداسىندا قازاقستاندىق تەننيسشى 7:6 (7:3)، 6:4 ەسەبىمەن باسىم تۇسسە، بيىل ادەلايدا 2 (اۋستراليا) تۋرنيرىندە پ. كۆيتوۆا قارىمتا قايىردى - 6:3، 7:5.

فينالدىق ماتچ بۇگىن تۇندە وتەدى.

ەسكە سالا كەتەيىك، بۇدان بۇرىن ەلەنا رىباكينانىڭ ماياميدە الەمنىڭ ءۇشىنشى راكەتكاسىن جەڭىپ، فينالعا شىققانىن جازعان بولاتىنبىز.

سونداي-اق، ەلەنا رىباكينا تاي-برەيك پەن ەيس جونىنەن بىرەگەي ناتيجەگە قول جەتكىزدى.

ول تاپقان تابىسى جونىنەن الەمدە كوش باسىنا شىقتى.

سپورتشىمىز مايامي تۋرنيرىنىڭ فينالىنا شىققانىنا قۋانىشتى ەكەندىگىن جەتكىزدى.