قايرات بورانبايەۆ مەملەكەتتىك ناگرادالاردى كەرى قايتارادى، مۇلكى تاركىلەنەدى - سوت ۇكىمى

استانا. قازاقپارات - سوت ۇكىمىندە قايرات بورانبايەۆقا تاعايىندالعان مەملەكەتتىك ناگرادالاردى كەرى قايتارۋ تۋرالى ايتىلعان، دەپ حابارلايدى قازاقپارات ءتىلشىسى.

«قىلمىستىق كودەكستىڭ 49-بابى 2-بولىگىنە سايكەس قايرات بورانبايەۆتى مەملەكەتتىك ناگرادالاردان ايىرۋ تۋرالى ۇسىنىس ەنگىزىلسىن»، - دەدى ۇكىمدى وقىعان سۋديا نازگۇل باپاقوۆا.

قايرات بورانبايەۆقا بەرىلگەن مەملەكەتتىك ناگرادالار قاتارىندا «قۇرمەت»، «ەرەن ەڭبەگى ءۇشىن»، «پاراسات» جانە Ⅲ دارەجەلى «بارىس» وردەنى بار.

«مەملەكەت مۇددەسىنە ق. بورانبايەۆتىڭ ءال-فارابي كوشەسىندەگى (الماتى قالاسى) ءۇي-جاي مەن جەر ۋچاسكەسى، «قازاقستان حالىق بانكى» ا ق شوتىنداعى 1 ميلليارد 270 ميلليون 190 مىڭ تەڭگە سوماسىنداعى قاراجات تاركىلەنسىن. سونىمەن قاتار، «قازاقستان حالىق بانكى» ا ق- داعى ەكى شوتقا ءبولىنىپ سالىنعان 2 ميلليارد 847 ميلليون 877 مىڭ 603 تەڭگە دە تاركىلەنسىن. اتالعان شوتتاعى قالعان سوماعا ارەست قويىلسىن»، - دەيدى سۋديا.

بۇعان دەيىن قايرات بورانبايەۆقا 8 جىلعا باس بوستاندىعىنان ايىرۋ جازاسى تاعايىندالعانى تۋرالى حابارلاعان ەدىك.

ەسكە سالساق، وتكەن جىلى 17- ناۋرىزدا سوتتىڭ شەشىمىمەن قايرات بورانبايەۆ 2 ايعا قامالعان ەدى. كەيىن قايرات ساتىبالدى مەن قايرات بورانبايەۆتىڭ سىرتقا زاڭسىز شىعارىلعان اكتيۆتەرى قايتارىلا باستاعانى حابارلاندى.

ايتا كەتسەك، استانادا قايرات بورانبايەۆقا قاتىستى سوت وتىرىسى بىلتىر 30- جەلتوقساندا باستالدى.

28- ناۋرىزدا وتكەن سوت وتىرىسىندا پروكۋرور قايرات بورانبايەۆتى 8 جىلعا باس بوستاندىعىنان ايىرىپ، مۇلكىن تاركىلەۋدى سۇرادى.

بۇگىن تۇسكە دەيىن قايرات بورانبايەۆ سوت الدىنداعى سوڭعى ءسوزىن ايتقان ەدى.