تۇركيا فينليانديانىڭ ناتوعا كىرۋىنە كەلىسىم بەردى

انكارا. انادولى - قازاقپارات - تۇركيا پارلامەنتى فينليانديانىڭ ناتوعا كىرۋ تۋرالى ءوتىنىشىن ماقۇلدادى، دەپ حابارلايدى قازاقپارات انادولى اگەنتتىگىنە سىلتەمە جاساپ.

فينليانديا اسكەري بلوكقا قوسىلۋ تۋرالى وتىنىشىنە 276 داۋىس جيناپ، انكارانىڭ رەسمي كەلىسىمىن الدى.

بەيسەنبى كۇنى تۇركيا پارلامەنتىندە بولعان داۋىس بەرۋ ناتيجەسى بويىنشا، ناتوعا مۇشە 30 مەملەكەتتىڭ ءبارى فينليانديانىڭ قوسىلۋىن راتيفيكاتسيالاعان.

فينليانديا مەن شۆەتسيا ناتو قۇرامىنا قوسىلۋعا بىلتىر مامىردا ۋكرايناداعى جانجال كەزىندە رەسمي ءوتىنىش بەردى.

ءبىراق ناتوعا 70 جىلدان استام ۋاقىت مۇشە بولىپ كەلە جاتقان تۇركيا ەكى سكانديناۆيالىق ەلگە اليانسقا قوسىلۋ شارتى رەتىندە ك ج پ (كۇردىستان جۇمىسشىلار پارتياسى) مەن فەتۋللا لاڭكەستىك ۇيىمى (FETO) سىندى لاڭكەستىك توپتارعا قارسى ناقتى شارا قولدانۋىن سۇرادى.

ماۋسىمدا فينليانديا مەن شۆەتسيا انكارا قاۋىپسىزدىك ماسەلەلەرىن شەشۋ ءۇشىن تۇركيامەن مەموراندۋمعا قول قويدى.

سودان بەرى ءۇش ەلدىڭ جوعارى شەندى ديپلوماتتارى مەن رەسمي تۇلعالارى ءۇشجاقتى كەلىسىمدى تالقىلاۋ ءۇشىن ءتۇرلى كەزدەسۋلەر وتكىزدى.

بىلتىر قاراشادا شۆەتسيا انكارا ستوكگولمنىڭ ناتوعا قوسىلۋ تۋرالى ءوتىنىشىن ماقۇلداي ما دەگەن ۇمىتپەن انتيتەررورلىق زاڭ قابىلدادى.

1- ماۋسىمدا كۇشىنە ەنەتىن جاڭا زاڭ بيلىك وكىلدەرىنە لاڭكەستىك توپتاردى قولدايتىن تۇلعالاردى سوت جۇزىندە باقىلاۋعا مۇمكىندىك بەرەدى.

وسى ايدا تۇركيا فينليانديانىڭ ناتوعا قوسىلۋ پروتسەسىن پارلامەنتتە ماقۇلدايتىنىن مالىمدەگەن بولاتىن.

رەسمي انكارا پىكىرىنشە، فينليانديا مۇشە بولۋ ءۇشىن قاجەتتىنىڭ ءبارىن ىستەدى، ال شۆەتسياعا ءالى جۇمىس ىستەۋ كەرەك.