كەنتاۋدىڭ ەكس-اكىمى راشيد ايۋپوۆ ەلوردادا تەرگەۋ يزولياتورىندا وتىر

استانا. قازاقپارات - كەنتاۋ قالاسىنىڭ بۇرىنعى اكىمى راشيد ايۋپوۆتىڭ وتكەن جىلعى قازان ايىنان باستاپ تەرگەۋ يزولياتورىندا قاماۋدا وتىرعانى بەلگىلى بولدى.

اقپاراتتى قىلمىستىق اتقارۋ جۇيەسى كوميتەتىنىڭ باسپا ءسوز قىزمەتى راستادى، دەپ حابارلايدى قازاقپارات ءتىلشىسى.

«ر. ايۋپوۆ 2022-جىلعى 17- قازاننان باستاپ استانا قالاسى بويىنشا قىلمىستىق اتقارۋ جۇيەسى دەپارتامەنتىنىڭ 64№ تەرگەۋ يزولياتورىندا قاماۋدا وتىر. قازىر وعان قاتىستى ق ر قىلمىستىق كودەكسىنىڭ 28-بابى 4-بولىگى، 312-بابى 5-بولىگى بويىنشا سوتقا دەيىنگى تەرگەۋ ءجۇرىپ جاتىر»، - دەلىنگەن رەسمي حابارلامادا.

سونداي-اق، كوميتەتتەن تەرگەۋ يزولياتورلارىندا قاماۋدا وتىرعانداردىڭ قولدانىستاعى زاڭناماعا سايكەس قۇقىعى مەن مىندەتى بارى ايتىلدى. سونداي-اق، ولاردىڭ مەكەمە كىتاپحاناسىنان كىتاپ الۋعا، ادۆوكاتتارمەن، قوعامدىق قورعاۋشىلار جانە تۋىستارىمەن كەزدەسۋگە مۇمكىندىگى بار.

ەسكە سالساق، ر. ايۋپوۆ وتكەن جىلى ناۋرىزدا تۇركىستان وبلىسى كەنتاۋ قالاسىنىڭ اكىمى بولىپ تاعايىندالعان ەدى. ال، 2019-جىلدىڭ شىلدە ايىنان 2021 جىلعا دەيىن تۇركىستان قالاسىنىڭ اكىمى قىزمەتىن اتقاردى.