بيىل قازاقستاندا ەڭ جوعارعى ينتەرنەت جەلىسىن تاراتۋ اۋقىمى كەڭەيەدى
Tele2/Altel باس ديرەكتورى سەرگەي كونكوۆ ەلىمىزدە 5G تەحنولوگياسى قانشالىقتى جىلدام تارايتىنى تۋرالى ءتۇسىندىردى.
«ءبىز وزىمىزگە تەحنولوگيانى ىسكە قوسۋ قۇقىعىن، جيىلىك رەسۋرسىن الۋ، جەلىنى ورنالاستىرۋ مىندەتىن الدىق. كەلەسى بەس جىلعا ليتسەنزيالىق مىندەتتەمەلەر بار. ءبىز بەس جىلدا شامامەن 3,5 مىڭ بازالىق ستانتسيا سالۋىمىز كەرەك. بۇل ءوز كەزەگىندە 5G تەحنولوگياسىن پايدالاناتىنداردىڭ 80 پايىزدان استامىن قامتيدى»، - دەدى س. كونكوۆ.
وسى ورايدا ول 5G تەحنولوگياسىنىڭ العاشقى سەكتورلارى استانا، الماتى جانە شىمكەنت قالالارىندا ىسكە قوسىلعانىن ەسكە سالدى.
«العاشقى بازالىق ستانتسيا استاناداعى ەكسپو اۋماعىندا ورناتىلدى. دەگەنمەن ول ەكسپو اۋماعىن تۇگەل قامتىمايدى. الداعى بىرنەشە ايدا استانادا جانە باسقا قالالاردا قامتۋ ايتارلىقتاي كەڭەيەدى»، - دەدى سپيكەر.
ەسكە سالساق، 2022-جىلى جەلتوقساندا قازاقستاندا 5G جيىلىكتەرىن تاراتۋ بويىنشا اۋكتسيون ءوتتى. ءبىرىنشى تەندەردە جيىلىك 62,6 ميلليارد تەڭگەگە، ەكىنشىسىندە 93,4 ميلليارد تەڭگەگە ساتىلدى.
ۇكىمەت باسشىسى ءاليحان سمايىلوۆ 5G ەنگىزۋدى 2027-جىلعا دەيىن اياقتاۋدى تاپسىردى.
«قازاق تەلەكوم» اكسيونەرلىك قوعامىنىڭ ەنشىلەس كومپانيالارى 2027-جىلعا دەيىن ەلىمىز بويىنشا 7 مىڭنان استام بازالىق ستانتسيا سالۋعا ءتيىس.
بيىل استانا، الماتى جانە شىمكەنت قالالارىندا وسىنداي 486 ستانتسيا پايدالانۋعا بەرىلەدى.