قازاقستاندىق تەننيسشى ماياميدە الەمنىڭ ءۇشىنشى راكەتكاسىن جەڭىپ، فينالعا شىقتى
بۇدان بۇرىن جازعانىمىزداي، ءبىرىنشى سەتتە ەلەنا رىباكينا تاي-برەيكتە قارسىلاسىنان باسىم تۇسكەن ەدى.
جاڭبىرعا بايلانىستى ۇزىلىستەن كەيىن ماتچ قايتا جالعاستى.
ەكىنشى سەتتە د. پەگۋلا برەيك جاساپ، 3:1 ەسەبىمەن العا كەتتى. دەگەنمەن ەلەنا تارازى باسىن تەڭەستىرىپ قانا قويماي، ءوزى العا شىقتى - 5:4. اقىرى ماتچقا دوپ بەرگەندە، ءوز مۇمكىندىگىن جىبەرگەن جوق - 6:4.
وسىعان دەيىن ە. رىباكينا د. پەگۋلادان ەكى رەت جەڭىلسە، سونىڭ ەسەسىن بۇگىن قايتاردى.
ءبىر ساعات 52 مينۋتقا سوزىلعان تارتىستى باسەكە بارىسىندا قازاقستاندىق تەننيسشى 11 ەيس جاساپ، 15 برەيك-پوينتتىڭ التاۋىن پايدالاندى. قارسىلاسى 1 ەيس، 5 برەيكپەن (11 برەيك- پوينت) كوزگە ءتۇستى.
ە. رىباكينا فينالدا باس جۇلدە ءۇشىن الەمنىڭ 12-راكەتكاسى، چەحيالىق پەترا كۆيتوۆا نەمەسە رەيتينگتە 74-ساتىداعى رۋمىنيالىق سورانا كىرستيانىڭ بىرەۋىمەن تالاسادى.