اۋە كومپانياسى «قارا تىزىمدەگىلەردى» تاسىمالداماۋعا قۇقىلى، ال جولاۋشىلار قۇقى قالاي كۇشەيتىلدى
ازاماتتىق اۆياتسيا كوميتەتى 2021-2022-جىلدار كەزەڭىندە جولاۋشىلاردان تۇسكەن وتىنىشتەرگە سايكەس جۇرگىزىلگەن تالداۋ قورىتىندىسى بويىنشا جولاۋشىلاردىڭ قۇقىقتارىن قورعاۋ جونىندەگى نورمالاردى كۇشەيتۋگە بايلانىستى جۇيەلى جۇمىس جۇرگىزدى.
اتاپ ايتقاندا، 2022-جىلدىڭ 29- جەلتوقسانىندا «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» زاڭعا ءتيىستى تۇزەتۋلەر مەن 2023-جىلدىڭ 14- ناۋرىزىندا جولاۋشىلاردى، جولجۇگىن جانە جۇكتەردى اۋە كولىگىمەن تاسىمالداۋ ەرەجەلەرىنە وزگەرىستەر ەنگىزىلدى. سوعان سايكەس:
1) اۆياكومپانيالاردىڭ جولاۋشىلار الدىنداعى جاۋاپكەرشىلىگىن كۇشەيتۋ ءۇشىن «رەيس مارتەبەسىن وزگەرتۋ» ۇعىمىن ەنگىزۋ. بۇعان دەيىن جىلى تاماق ۇسىنۋ، قوناق ۇيدە كۇنەلتۋ جانە وعان بارىپ قايتۋ قىزمەتتەرى رەيس كەشىكتىرىلگەن نەمەسە توقتاتىلعان جاعدايدا عانا بەرىلىپ كەلگەن. ەندى تاسىمالداۋشىلار جوعارىدا اتالعان قىزمەتتەردى رەيستىڭ ۇشىپ كەلۋ ۋاقىتىنا نەمەسە باعىتىنا اسەر ەتەتىن كەز كەلگەن وزگەرىستەر كەزىندە ۇسىنۋعا مىندەتتى.
2) ەگەر دە جولاۋشى اۆياكومپانيانىڭ قىزمەتىن پايدالانۋعا شەكتەۋلى (وسىعان دەيىن اتالعان نورما بولماعان) تۇلعالاردىڭ تىزىمىندە بولعان جاعدايدا تاسىمالداۋشىنىڭ باستاماسىمەن اۋە تاسىمالى توقتاتىلۋى مۇمكىن. بۇل نورما «قارا تىزىمدەگى» دەسترۋكتيۆتى جولاۋشىلارعا بايلانىستى ەنگىزىلىپ وتىر. اۆياكومپانيا جولاۋشىنىڭ ءىس- ارەكەتتەرىنەن اكىمشىلىك نەمەسە قىلمىستىق قۇقىق بۇزۋشىلىق بەلگىلەرى بايقالعان جاعدايدا عانا «قارا تىزىمگە» قوسۋعا قۇقىلى.
3) جولاۋشىنى جەكە تەلەفون ءنومىرى مەن ەلەكتروندى پوشتاسى ارقىلى رەيستىڭ كەشىگۋى، سونداي- اق ونىڭ بۇل جاعدايداعى قۇقىقتارى تۋرالى مىندەتتى تۇردە حاباردار ەتۋ (بۇل نورما قاراستىرىلماعان ەدى). بۇعان دەيىن مۇنداي جۇمىس ەرىكتى تۇردە جۇرگىزىلىپ كەلدى. ءبىراق، جەكەلەگەن كومپانيالار بۇل تاجىريبەنى مۇلدەم ۇستانباعان، ال كەيبىر جاعدايدا اقىلى نەگىزدە قىزمەت كورسەتكەن.
بۇل رەتتە اۆياكومپانيالار رەيس مارتەبەسىنىڭ وزگەرۋى مەن جاڭا ۇشۋ ۋاقىتىنىڭ سەبەپتەرى تۋرالى نەمەسە جاڭا مارشرۋت جونىندە حابارلاندىرۋدان بولەك، اتالعان وزگەرىستەر تاسىمالداۋشىنىڭ كىناسىنەن، ءيا بولماسا ۇشاقتىڭ كەشىگۋىنەن بولعان جاعدايدا رەيس مارتەبەسىنىڭ وزگەرۋىنە بايلانىستى ۇسىنىلاتىن قىزمەتتەر تىزبەسى جونىندە دە اقپاراتتاندىرۋعا مىندەتتى.
وسىعان بايلانىستى ەلىمىزدىڭ اۆياتسيالىق بيلىگى جولاۋشىلاردان بيلەتتەردى ساتىپ الۋ كەزىندە جەكە بايلانىس مالىمەتتەرىن (ۇيالى ءنومىر مەن ەلەكتروندى مەكەنجايدى) كورسەتۋىن سۇرايدى.
4) تاسىمالداۋشى ۇيىمنىڭ كەسىرىنەن رەيس مارتەبەسى وزگەرگەن جاعدايدا قىزمەت كورسەتۋ مەن %3 مولشەرىندە ايىپپۇلدى تولەۋ تۇرىندە اۋە كومپانيالاردىڭ جاۋاپكەرشىلىگىن كۇشەيتۋ، سونداي-اق ايىپپۇل وتەلمەگەن جاعدايدا اكىمشىلىك جاۋاپقا تارتۋدىڭ جولدارىن قاراستىرۋ (بۇعان دەيىن بۇل ءتارتىپ بولماعان). جۇرگىزىلگەن تالداۋ جەكەلەگەن قىزمەت ۇسىنۋشىنىڭ جولاۋشىلارعا وتەماقىنى ۋاقتىلى تولەمەيتىنىن كورسەتتى. وكىنىشكە قاراي، اۆياكومپانيالاردىڭ ۇشۋ كۇنىنەن باستاپ 6-7 اي كولەمىنە دەيىن وتەماقىنى تولەمەگەن فاكتىلەر تىركەلگەن. جاڭا نورما رەيستى كەشىكتىرگەنىنە بايلانىستى وتەماقىنى ۋاقتىلى تولەمەيتىن ۇيىمدارعا ءتيىستى شارالاردى قابىلداۋعا مۇمكىندىك بەرەدى.
5) رەيستىڭ مارتەبەسى 5 ساعات ارتىق ۋاقىتتان كەيىن وزگەرگەن كەزدە قاراجاتتى تولىق قايتارۋ نەمەسە قايتا برونداۋ قۇقىعىن ەنگىزۋ. وسىعان دەيىن بيلەت اقشاسى رەيس 10 ساعاتتان ارتىق ۋاقىت اسقان جاعدايدا عانا تولىق كولەمدە وتەلىپ كەلدى. الايدا، 10 ساعات وتكەننەن كەيىن اۋە تاسىمالىنىڭ وزەكتىلىگى جويىلىپ كەتەتىنى ەسكەرىلىپ، بۇل ۋاقىت 5 ساعاتقا دەيىن قىسقاردى.
ازاماتتىق اۆياتسيا كوميتەتى مەن قازاقستاننىڭ اۆياتسيالىق اكىمشىلىگى الداعى ۋاقىتتا كەلىپ تۇسەتىن وتىنىشتەرگە تالداۋ جۇرگىزىپ، قاجەت بولعان جاعدايدا حالىقارالىق ستاندارتتار مەن الەمدىك ءۇردىستى ەسكەرە وتىرا، وسى باعىتتاعى زاڭنامانىڭ تالاپتارىن قايتا قارايتىن بولادى.