شەتەلدەگى ەتنيكالىق قازاقتارعا جۇزدەگەن وقۋ گرانتى ءبولىندى

استانا. قازاقپارات - عىلىم جانە جوعارى ءبىلىم مينيسترلىگى قازاقستاننىڭ جوعارى وقۋ ورىندارىندا گرانت بويىنشا ءبىلىم العىسى كەلەتىن شەتەل ازاماتتارىنان قۇجات قابىلداۋ باستالعانىن حابارلادى، دەپ حابارلايدى قازاقپارات ءتىلشىسى.

«بۇگىن ەلىمىزدەگى جوعارى وقۋ ورىندارىندا ءبىلىم الۋعا ارنالعان ستيپەنديالىق باعدارلاماعا قۇجات قابىلداۋ باستالدى. باعدارلاماعا شەتەل ازاماتتارى، ونىڭ ىشىندە قازاقستان رەسپۋبليكاسىنىڭ ازاماتىعى جوق قازاق ۇلتىنىڭ وكىلدەرى قاتىسا الادى. ءوتىنىش بەرۋ ونلاين فورماتتا ق ر ع ج ب م جوعارى ءبىلىمدى دامىتۋدىڭ ۇلتتىق ورتالىعىنىڭ ۆەب- پورتالى (ۆەب- سايتى) ارقىلى جۇزەگە اسىرىلادى»، - دەپ جازادى مينيسترلىكتىڭ باسپا ءسوز قىزمەتى.

ناقتىراق ايتساق، باكالاۆريات، ماگيستراتۋرا جانە دوكتورانتۋرانىڭ ءبىلىم بەرۋ باعدارلامالارى بويىنشا قازاقستاننىڭ جوعارى وقۋ ورىندارىندا شەتەل ازاماتتارىن وقىتۋ ءۇشىن 550 گرانت ءبولىنىپ وتىر.

«ونىڭ ىشىندە باكالاۆرياتقا 490 گرانت، ماگيستراتۋراعا 50 گرانت، PhD دوكتورانتۋراعا 10 گرانت بولىنگەن. باعدارلاما اياسىندا تەگىن ءبىلىم بەرۋ مەن ءبىلىم الۋشىنىڭ اكادەميالىق جەتىستىكتەرىنە بايلانىستى اي سايىنعى ستيپەنديا تولەنەدى»، - دەلىنگەن رەسمي مالىمەتتە.

ونلاين قۇجات قابىلداۋ مينيسترلىكتىڭ جوعارى ءبىلىمدى دامىتۋ ۇلتتىق ورتالىعىنىڭ سايتىندا 30-ناۋرىزدا باستاپ، 30-ماۋسىمعا دەيىن جالعاسادى.

ۇمىتكەرلەردى ىرىكتەۋ ۇسىنىلعان قۇجاتتار، بەيىمدەلۋ الەۋەتىن انىقتاۋعا ارنالعان ونلاين- تەستىلەۋ ناتيجەلەرى جانە ونلاين اڭگىمەلەسۋ نەگىزىندە جۇرگىزىلەدى. ستيپەندياتتار ءتىزىمى بيىلعى جىلدىڭ 28-تامىزىنا دەيىن جاريالانادى.

قوسىمشا سۇراقتار بويىنشا مىنا نومىرلەر ارقىلى جاۋاپ الۋعا بولادى: 87172287526 ، 287531.

اۆتور

ەسىمجان ناقتىباي