عالىمدار: وسىمدىكتەر دىبىس شىعارادى

استانا. قازاقپارات - ەستىمەگەن ەل دە كوپ. وسىمدىكتەر دە دىبىس شىعارادى. مۇنى يزرايل عالىمدارى انىقتاپ، دالەلدەدى. بۇل جاڭالىققا شىنىمەن «الەمدە تالاي قىزىق بار» دەپ تاڭقالۋعا بولادى.

ويتكەنى وسىمدىكتەر دىبىس شىعارادى دەگەن ەشكىمنىڭ ويىنا كىرىپ- شىقپايدى. ەندى مۇنى عالىمدار دالەلدەپ وتىر. سولار جازعان وسىمدىكتىڭ دىبىسىن ءسىز دە ەستىپ كورىڭىز.

ليلاح حاداني، بيولوگ:

- ءبىز بيداي، ءجۇزىم، قىزاناق، كاكتۋس پەن تەمەكى وسىمدىگىنىڭ دىبىسىن جازىپ الدىق. كوبىنەسە ولار 2 جاعدايدا دىبىس شىعارادى. شولدەپ، قۋراي باستاعاندا جانە كەسكەندە. مىسالى، ءبىز قايشىمەن كەستىك. سوسىن وسىمدىككە سۋ قۇيىپ جاتىپ، توقتاي قالساڭىز ول دا دىبىس شىعارادى جانە ەكىنشى كۇنى بۇل دىبىس ۇلعايا تۇسەدى. جايشىلىقتا ءبىز بۇل دىبىستى ەستي المايمىز. ءبىراق وسىمدىكتىڭ جانايقايىن ەستيتىن تىرشىلىك يەلەرى بار ەكەن. وسىمدىكتەردىڭ دىبىسىن ەستيتىن جانۋارلار بار. ماسەلەن، كوبەلەكتەر مەن جارقاناتتار ولاردى ەستي الادى. ءبىراق وسىمدىكتىڭ بۇل دىبىستى نە ءۇشىن شىعاراتىنى ازىرگە تۇسىنىكسىزدەۋ. مەنىڭ پايىمداۋىمشا، مۇنىڭ 2 سەبەبى بار. بىرىنشىدەن، ولار وسىلايشا سىرتقى الەممەن تىلدەسكىسى كەلەدى. نەمەسە وسى وسىمدىكتىڭ وزىنە ءتان ءبىر ءىس- ارەكەتىنىڭ ءۇنى بولۋى مۇمكىن. مىسالى، كوبەلەك ۇرىعىن قىزاناققا تاستايتىن كەزدە دىبىس شىعادى.

يەحۋدا انيكستەر، وسىمدىك زەرتتەۋشىسى:

- ءبىز ءدال قازىر قىزاناق وسىمدىگىنىڭ دىبىسىن تىڭداپ جاتىرمىز. قالىپتى جاعدايدا بۇل دىبىستى ەستۋ مۇلدە مۇمكىن ەمەس. ءبىز ارنايى اسپاپتىڭ كومەگىمەن ونىڭ جيىلىگىن ادامنىڭ قۇلاعىنا ەستىلەتىندەي دەڭگەيگە جەتكىزىپ، جازىپ الدىق. بۇل زەرتتەۋ 6 جىل بويى جۇرگىزىلىپ، كەشە عانا امەريكاندىق «Cell» جۋرنالىندا جاريالاندى.

www.24.kz