قوستانايداعى پرەزيدەنت رەزيدەنسياسى بالالاردى ەمدەۋ ورتالىعى بولادى
بۇل تۋرالى وبلىستىق اكىمدىكتىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تاپسىرماسىنا سايكەس، ايماقتىق رەزيدەنسيانىڭ الداعى ۋاقىتتاعى قىزمەتىن ايقىنداۋ ماقساتىندا قوستاناي وبلىسى اكىمدىگى جانىنان ارنايى جۇمىس توبى قۇرىلىپ، قوعام وكىلدەرى مەن مۇددەلى مەملەكەتتىك ورگانداردىڭ ءبىرقاتار ۇسىنىس، تىلەكتەرى تىڭدالدى. جۇمىس توبىنىڭ شەشىمىمەن ايماقتىق رەزيدەنتسيانى پسيحونيەۆرولوگيالىق اۋىتقۋعا ۇشىراعان جانە تىرەك- قيمىل قوزعالىسىنا زاقىم كەلگەن بالالارعا ارنالعان رەابيليتاتسيالىق ورتالىققا بەيىمدەۋ تۋرالى شەشىم قابىلداندى. رەزيدەنتسيانى رەابيليتاتسيالىق ورتالىققا اينالدىرۋ ماقساتىندا جەرگىلىكتى بيۋدجەتتەن قارجى قاراستىرىلادى»، - دەپ ءمالىم ەتتى اكىمدىكتىڭ باسپا ءسوز قىزمەتىنەن.
ءمالىم بولعانداي، بيىل عيماراتتى قايتا جابدىقتاۋ بويىنشا جوبالاۋ- سمەتالىق قۇجاتتارى ازىرلەنەدى.
«رەزيدەنتسيا اۋماعىندا بارلىعى 6 تۇرعىن ءۇي جانە سانيتارلىق كورپۋس ورنالاسقان، ولار مۇگەدەكتىگى بار ادامداردىڭ ىڭعايىنا ساي جاڭارتىلاتىن بولادى. سونداي- اق، ىرگەلەس اۋماقتى اباتتاندىرۋ جوسپارلانۋدا. ەڭ ۇلكەن عيماراتتا ارناۋلى الەۋمەتتىك قىزمەتتەر، ونىڭ ىشىندە الەۋمەتتىك- پەداگوگيكالىق، الەۋمەتتىك- مادەني، الەۋمەتتىك- مەديتسينالىق، الەۋمەتتىك- ەڭبەك قىزمەتتەرىن كورسەتۋ ءۇشىن كابينەتتەر ورنالاستىرۋ جوسپارلانعان»، - دەپ ءتۇسىندىردى باسپا ءسوز قىزمەتىنەن.
ال قالعان تۇرعىن ءۇي عيماراتتارى وڭالتۋ ورتالىعىنىڭ ماماندارىن ورنالاستىرۋ ءۇشىن پايدالانىلادى.
اۆتور
ءاليحان اسقار