تۇركيا پارلامەنتى فينليانديانىڭ ناتو- عا كىرۋى تۋرالى حاتتامانى ماقۇلدادى

None
استانا. قازاقپارات - تۇركيانىڭ ۇلتتىق ءماجىلىسى (پارلامەنت) فينليانديانىڭ ناتو ۇيىمىنا كىرۋى تۋرالى حاتتامانى راتيفيكاتسيالاۋ تۋرالى زاڭ جوباسىن ماقۇلدادى. داۋىس بەرۋ بەيسەنبى كۇنى پارلامەنتتىڭ جالپى وتىرىسىندا ءوتتى.

بۇل تۋرالى قازاقپارات ت ا س س اقپارات اگەنتتىگىنە سىلتەمە جاساپ حابارلايدى.

وتىرىسقا قاتىسقان 276 ادامنىڭ بارلىعى زاڭ جوباسىن قولدادى. وسىلايشا فينليانديا وداققا تولىق كىرۋ ءۇشىن زاڭدى نەگىز الدى.

تۇركيا حەلسينكيدىڭ اليانسقا قوسىلۋ ۇسىنىسىن ماقۇلداماعان ناتو- نىڭ سوڭعى مۇشەسى بولدى. ۆەنگريا بۇل پروتسەستى كەيىنگە قالدىردى، ءبىراق 27-ناۋرىزدا ءتيىستى زاڭ جوباسىن ماقۇلدادى. ەندى ۇيىمنىڭ بارلىق مۇشەلەرى فينليانديانىڭ كانديداتۋراسىن ماقۇلدادى.

پلەنارلىق وتىرىس بارىسىندا تۇرىك دەپۋتاتتارى قازىرگى كەزەڭدە انكارانىڭ لاڭكەستىكپەن كۇرەس سالاسىنداعى مۇددەلەرىن ەسكەرۋ تۇرعىسىنان تۇركيا مەن فينليانديا اراسىنداعى قارىم- قاتىناستا كۇردەلى پروبلەمالار جوق ەكەنىن اتاپ ءوتتى. بۇل رەتتە زاڭ شىعارۋشىلار فينليانديامەن بىرگە ناتو- عا مۇشەلىككە ءوتىنىش بەرگەن شۆەتسيانىڭ تۇركيامەن قول قويىلعان مەموراندۋم ەرەجەلەرىن ءالى ورىنداماعانىن جانە ءالى دە اليانستىڭ ءبىر بولىگى بولۋعا دايىن ەمەستىگىن اتاپ ءوتتى.

فينليانديا مەن شۆەتسيا سولتۇستىك اتلانتيكالىق اليانسقا مۇشەلىككە ءوتىنىشىن 2022 -جىلدىڭ مامىر ايىندا بەرگەن، ءبىراق انكارا ولاردان كۇرد ۇيىمدارىن تەرروريستىك دەپ جاريالاۋدى، سونداي- اق تەرروريزم نەمەسە 2016 -جىلى تۇركياداعى توڭكەرىس ارەكەتىنە قاتىستى دەپ ايىپتالعان ادامداردى ەكستراديتسيالاۋدى تالاپ ەتىپ، قوسىلۋ پروتسەسىنە توسقاۋىل قويدى. بۇل ماسەلەلەردى 2022 -جىلى ناتو سامميتىنە دەيىن شەشۋ ءۇشىن تۇركيا، فينليانديا جانە شۆەتسيا اراسىندا ناقتى قادامدار ءتىزىمى بار مەموراندۋمعا قول قويىلدى.

اۆتور

زارينا تۋعانبايەۆا


سوڭعى جاڭالىقتار