وقۋ-اعارتۋ مينيسترلىگىنە ءبىرقاتار قوسىمشا قۇزىرەت بەرىلمەك

استانا. قازاقپارات - وقۋ-اعارتۋ مينيسترلىگىنە ءبىرقاتار قوسىمشا قۇزىرەت بەرىلۋى ىقتيمال. ءتيىستى ۇكىمەت قاۋلىسى كوپشىلىك تالقىلاۋعا شىعارىلدى، دەپ حابارلايدى قازاقپارات ءتىلشىسى.

جاڭا وزگەرىسكە ساي، ەندى اتالعان ۆەدومستۆوعا مىنا قۇزىرەتتەر بەرىلمەك:

- 12 جاستان 35 جاسقا دەيىنگى بالالار مەن جاستاردى پاتريوتتىق تانىتقانى جانە بەلسەندى ازاماتتىق ۇستانىمى ءۇشىن ەرەكشەلىك بەلگىسىمەن ناگرادتاۋ قاعيدالارىن بەكىتۋ؛

- 14 جاستان 35 جاسقا دەيىنگى بالالار مەن جاستاردى پاتريوتتىق تانىتقانى جانە بەلسەندى ازاماتتىق ۇستانىمى ءۇشىن ەرەكشەلىك بەلگىسىمەن ناگرادتاۋ جونىندەگى ءىس-شارالاردى جۇزەگە اسىراتىن ۇيىمدى ايقىنداۋ؛

- مەملەكەتتىك ءبىلىم بەرۋ ۇيىمدارى قىزمەتكەرلەرىنىڭ ۇلگىلىك شتاتتارىن ايقىنداۋ؛

- تەحنيكالىق جانە كاسىپتىك، ورتا بىلىمنەن كەيىنگى ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىنا وقۋعا ءتۇسۋ كەزىندە قابىلداۋ كۆوتاسىنىڭ مولشەرىن بەكىتۋ؛

- ەڭبەك نارىعىنىڭ قاجەتتىلىكتەرىن ەسكەرە وتىرىپ، رەسپۋبليكالىق بيۋدجەتتەن قارجىلاندىرىلاتىن ءبىلىم بەرۋ ۇيىمدارىندا، سونداي- اق تەحنيكالىق جانە كاسىپتىك، ورتا بىلىمنەن كەيىنگى ءبىلىمى بار كادرلاردى دايارلاۋعا مەملەكەتتىك ءبىلىم بەرۋ تاپسىرىسىن بەكىتۋ؛

- «وركەن» گرانتىن بەرۋ قاعيدالارىن جانە ونىڭ مولشەرىن بەكىتۋ؛

- اككرەديتتەۋ ورگاندارىنا، ونىڭ ىشىندە شەتەلدىك اككرەديتتەلگەن ورگاندارىنا قويىلاتىن تانۋ قاعيدالارىن بەكىتەدى. تانىلعان اككرەديتتەۋ ورگاندارىنىڭ، اككرەديتتەلگەن ءبىلىم بەرۋ ۇيىمدارى مەن ءبىلىم بەرۋ باعدارلامالارىنىڭ ءتىزىلىمىن، سونداي-اق ولاردى وعان ەنگىزۋ، توقتاتا تۇرۋ جانە ودان شىعارۋ نەگىزدەرىن قالىپتاستىرۋ جانە بەكىتۋ؛

- مەكتەپكە دەيىنگى، ورتا، تەحنيكالىق جانە كاسىپتىك، ورتا بىلىمنەن كەيىنگى ءبىلىم بەرۋ ۇيىمدارىن دامىتۋ باعدارلاماسىنىڭ قۇرىلىمى جانە ونى ازىرلەۋ قاعيدالارىن بەكىتۋ.

مينيسترلىك تۇسىندىرمەسىنە ساي، بۇل قۇزىرەتتەردى بەرۋ - ءبىلىم سالاسىن ودان ءارى دامىتۋعا جانە ونىڭ ساپاسىن ارتتىرۋعا ىقپال ەتپەك.

قاۋلى 12-ساۋىرگە دەيىن كوپشىلىك تالقىلاۋدا بولادى.