مەملەكەتتىك قىزمەتشىنى قوسىمشا جۇمىسقا جەككەندەرگە ايىپپۇل سالىنادى - اگەنتتىك

استانا. قازاقپارات - مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ مەملەكەتتىك قىزمەتشىلەردىڭ قۇقىعىن قورعاۋ بويىنشا اتقارىلىپ جاتقان شارالار تۋرالى ايتتى، دەپ حابارلايدى قازاقپارات ءتىلشىسى.

ۆەدومستۆو باسشىسى مەملەكەتتىك قىزمەتشىلەر تاراپىنان شامادان تىس ۇستەمە جۇمىس بويىنشا شاعىم ءجيى تۇسەتىنىن ءمالىم ەتتى.

ال اگەنتتىك ءتوراعاسىنىڭ ورىنباسارى اينۇر سەرعازيەۆانىڭ ايتۋىنشا، قازىر قىزمەتشىلەرگە ارنالعان سيفرلىق كۋالىكتەر ازىرلەنگەن. ول ارقىلى جۇمىسكەردىڭ قاي ۋاقىتتا وفيسكە كەلگەنىن جانە قاشان قىزمەت ورنىنان شىققانىن بىلۋگە بولادى. تيىسىنشە بۇل اقپاراتتار ورتالىقتاندىرىلعان كىرۋدى باقىلاۋ جانە باسقارۋ جۇيەسىنە (ك ب ب ج) تۇسەدى.

«ءبىز بارلىعىن ك ب ب ج ارقىلى باقىلايتىن بولامىز. قۇقىق بۇزۋشىلىقتار انىقتالعان جاعدايدا، ءبىزدىڭ قىزمەتكەرلەر ءبىرىنشى باسشىعا حابارلاما جىبەرەدى. مۇنداي جاعداي ءبىرىنشى رەت بولسا، ەسكەرتۋ جاسايمىز. ال قايتالانسا، وندا اكىمشىلىك جاۋاپقا تارتۋ، ياعني ايىپپۇل سالۋ شارالارى قاراستىرىلۋدا»، - دەپ توقتالدى دارحان جازىقبايەۆ پارلامەنت سەناتىنىڭ دەپۋتاتتارىمەن وتكەن كەزدەسۋدە.

ەسكە سالايىق، بۇعان دەيىن ەڭبەك كودەكسىنە ءبىرقاتار وزگەرىس ەنگىزۋ جوسپارلانىپ وتىرعانىن حابارلاپ ەدىك. اتاپ ايتقاندا، جۇمىس بەرۋشى قىزمەتكەردى مەيرام كۇندەرى جۇمىسقا شىعارۋ ءۇشىن كەلىسىمىن الۋى كەرەك. سايكەسىنشە، جۇمىسشىلار ەڭبەك كودەكسىنە ەنگىزىلگەن وسى وزگەرىستى العا تارتىپ، كەستەدەن تىس جۇمىستان باس تارتا الادى.

اۆتور

ءاليحان اسقار