ەندى ۇلتتىق عىلىم اكادەمياسىنىڭ باسشىسىن پرەزيدەنت تاعايىندايدى

استانا. قازاقپارات - مەملەكەت باسشىسى «ق ر ۇلتتىق عىلىم اكادەمياسىنىڭ كەيبىر ماسەلەلەرى تۋرالى» جارلىققا قول قويدى. ەندى بۇل ۇيىم ق ر پرەزيدەنتىنىڭ جانىنداعى ۇلتتىق عىلىم اكادەمياسى بولىپ وزگەردى، دەپ حابارلايدى قازاقپارات ءتىلشىسى.

«قازاقستان رەسپۋبليكاسى ۇلتتىق عىلىم اكادەمياسىنىڭ مارتەبەسىن جوعارىلاتۋ ماقساتىندا «قازاقستان رەسپۋبليكاسىنىڭ پرەزيدەنتى تۋرالى» ق ر كونستيتۋتسيالىق زاڭىنىڭ 10 جانە 33-باپتارىنا سايكەس قاۋلى ەتەمىن:

«ق ر ۇلتتىق عىلىم اكادەمياسى» كوممەرتسيالىق ەمەس اكتسيونەرلىك قوعامىن قازاقستان رەسپۋبليكاسى پرەزيدەنتىنىڭ جانىنداعى «قازاقستان رەسپۋبليكاسىنىڭ ۇلتتىق عىلىم اكادەمياسى» كوممەرتسيالىق ەمەس اكتسيونەرلىك قوعامى ەتىپ قايتا وزگەرتسىن. ۇلتتىق عىلىم اكادەمياسىنىڭ پرەزيدەنتىن ق ر پرەزيدەنتى لاۋازىمعا تاعايىندايدى جانە لاۋازىمنان بوساتادى دەپ بەلگىلەنسىن»، - دەلىنگەن مەملەكەت باسشىسىنىڭ جارلىعىندا.

جارلىق جاريالانعان كۇننەن باستاپ كۇشىنە ەنەدى.

ەسكە سالا كەتەيىك، بىلتىر 1-ماۋسىمدا قازاقستاننىڭ ۇلتتىق عىلىم اكادەمياسىنىڭ 75 جىلدىق مەرەيتويلىق سەسسياسىندا پرەزيدەنت قاسىم-جومارت توقايەۆ بيۋدجەتتەن قارجى ءبولىپ، مەملەكەتتىك مارتەبە بەرە وتىرىپ، اكادەميانىڭ ءرولىن ارتتىرۋدى تاپسىرعان بولاتىن.

«قارا شاڭىراقتىڭ ءرولىن ارتتىرۋ اسا ماڭىزدى. سوندىقتان، وعان مەملەكەتتىك مارتەبە بەرەمىز جانە بيۋدجەت ەسەبىنەن قارجىلاندىرامىز. ونىڭ قازىر اتقارىپ وتىرعان قىزمەتىنەن باسقا دا مىندەتتەرىن ناقتى بەلگىلەۋ قاجەت. اتاپ ايتقاندا، عىلىمي باسىمدىقتاردى ءدال وسى قۇرىلىم ايقىنداۋى كەرەك. ارناۋلى گرانتتار، ستيپەنديالار جانە سىيلىقتار تاعايىنداۋ قۇزىرەتى دە اكادەمياعا بەرىلگەنى ءجون»، - دەگەن ەدى پرەزيدەنت.

كەيىن اكادەميكتەردىڭ ۇسىنىسى بويىنشا ۇكىمەت ۇ ع ا-نى ترانسفورماتسيالاۋ جونىندەگى مەملەكەتتىك كوميسسيا قۇردى. ونىڭ نەگىزگى مىندەتى اكادەميا قىزمەتىنىڭ نەگىزگى باعىتتارى بويىنشا ءبىرىڭعاي ۇستانىمدى قالىپتاستىرۋ بولدى.