ماجىلىسپەن جانە ۇكىمەتپەن بىرگە جاڭا فورماتسياداعى زاڭدار قابىلداۋىمىز كەرەك - سەنات ءتوراعاسى

استانا. قازاقپارات - سەنات سپيكەرى ماۋلەن اشىمبايەۆتىڭ توراعالىعىمەن «ءوڭىر» دەپۋتاتتىق توبىنىڭ جاڭارعان قۇراممەن العاشقى وتىرىسى ءوتتى، دەپ حابارلايدى قازاقپارات.

وندا دەپۋتاتتار مەملەكەت باسشىسى قاسىم-جومارت توقايەۆتىڭ VIII سايلانعان پارلامەنتتىڭ ءبىرىنشى سەسسياسىندا پارلامەنت پەن ۇكىمەتكە جۇكتەگەن مىندەتتەرىن تالقىلادى.

وتىرىستى اشقان ماۋلەن اشىمبايەۆ ەل پرەزيدەنتى بەلگىلەپ بەرگەن ماڭىزدى باسىمدىقتار جاڭارعان پارلامەنتتىڭ جۇمىسىنداعى اسا وزەكتى باعىتتار ەكەنىن اتاپ ءوتتى.

«پرەزيدەنتىمىزدىڭ تاپسىرمالارى اياسىندا ماجىلىستەگى ارىپتەستەرىمىزبەن جانە ۇكىمەتپەن بىرلەسىپ، جاڭا فورماتسياداعى زاڭدار قابىلداۋىمىز كەرەك. ول دەگەنىمىز - ەل دامۋىنىڭ جاڭا كەزەڭىنەن جول اشاتىن، كەشەندى رەفورمالاردى قامتيتىن جانە بۇگىنگى سىن-قاتەرلەر ەسكەرىلگەن زاڭدار. پالاتانىڭ كۇن تارتىبىندە ادىلەتتى قازاقستان قۇرۋعا ارنالعان زاڭداردى قابىلداۋ مىندەتى دە تۇر. ولاردىڭ قاتارىندا شەتەلگە زاڭسىز شىعارىلعان اكتيۆتەردى قايتارۋ جونىندەگى زاڭ جانە مەملەكەتتىك ساتىپ الۋ تۋرالى جاڭا زاڭ بار»، - دەدى ماۋلەن اشىمبايەۆ.

سونىمەن قاتار سەنات ءتوراعاسى سالىق، بيۋدجەت، قالا قۇرىلىسى جانە سۋ كودەكستەرىن قابىلداۋ بويىنشا جۇمىستى ساپالى ۇيىمداستىرۋدىڭ ماڭىزدى ەكەنىن ايتتى.

مەملەكەت باسشىسى ايقىنداعان باسىم باعىتتاردىڭ ءبىرى - وڭىرلەردى دامىتۋ. بۇل - سەنات جۇمىسىنداعى ماڭىزدى باسىمدىقتاردىڭ ءبىرى جانە «ءوڭىر» دەپۋتاتتىق توبى اتقاراتىن قىزمەتتىڭ نەگىزى ەكەنى بەلگىلى. سوعان بايلانىستى پالاتا سپيكەرى دەپۋتاتتىق توپ جۇمىسىنىڭ باستى باعىتتارىن اتاپ كورسەتتى. ناقتى ايتقاندا، «ءوڭىر» توبىنا مۇشە سەناتورلار وڭىرلەرگە جۇيەلى تۇردە شىعىپ، جەرگىلىكتى حالىقپەن، ونىڭ ىشىندە اۋىل تۇرعىندارىمەن كەزدەسىپ، ايماقتاعى كوپشىلىكتى الاڭداتقان پروبلەمالاردى انىقتاپ، ولاردىڭ وڭ شەشىلۋىنە ىقپال ەتۋى كەرەك.

سەنات ءتوراعاسى ول ءۇشىن ءداستۇرلى تەتىكتەرمەن بىرگە جاڭا تاسىلدەردى دە قولدانۋ قاجەت ەكەنىن، ساراپشىلاردى، جۇرتشىلىقتى جانە ب ا ق وكىلدەرىن جۇمىلدىرا وتىرىپ جۇمىس ىستەۋ كەرەكتىگىن ايتتى.