قارجى پيراميدالارى: اگەنتتىك حالىقتى ساقتاندىرۋ ءۇشىن اقپاراتتاندىرۋ تاسىلدەرىن تۇرلەندىرمەك
بۇل تۋرالى اگەنتتىكتىڭ باسقارما باسشىسى اندرەي داۆىدوۆ ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى.
«مۇددەلى مەملەكەتتىك ورگاندارمەن بىرگە قارجى پيراميدالارىمەن بايلانىسى بار قىلمىستار تۋرالى، مەحانيزمدەر مەن امالدار تۋرالى SMS- ەسكەرتپە جولداۋ جوباسىن ىسكە اسىرۋدى جوسپارلاپ وتىرمىز. بۇل جەردە، ارينە، بايلانىس وپەراتورلارىنىڭ تاراپىنان تۇسىنىستىك قاجەت. ويتكەنى، ونداي قىزمەتتەر اقىلى. بۇل جۇمىس ازاماتتاردىڭ الەۋمەتتىك جاعدايىنا وڭ اسەر ەتەتىنىن، اركىم نازار اۋدارۋعا تۇراتىن ماڭىزدى ماسەلە ەكەنىن ۇمىتپاۋ كەرەك»، - دەدى ول.
سونداي-اق، زاڭسىز جوبالار تۋرالى مالىمەتتەردى بەينەروليك رەتىندە وڭدەپ، ينتەرنەتتە ءتۇرلى جولدارمەن جۇرتقا تاراتۋ كوزدەلىپ وتىر.
«بۇل الاياقتارعا قارسى قارىمتا ناسيحات بولادى. ويتكەنى، ولار دا وزدەرىنىڭ زاڭسىز ارەكەتتەرىندە ينتەرنەتتىڭ ءتۇرلى مۇمكىندىكتەرىن بەلسەندى پايدالانادى. مۇنداي جولدار حالىقتىڭ الاياقتىق ارەكەت تۋرالى دەر كەزىندە ءبىلىپ، ودان اۋلاق بولۋىنا جاعداي تۋعىزادى»، - دەدى اندرەي داۆىدوۆ.