ءبىرقاتار مەملەكەت باسشىلارى قازاقستان پرەزيدەنتىن رامازان ايىنىڭ باستالۋىمەن قۇتتىقتادى

استانا. قازاقپارات - پرەزيدەنتتىڭ اتىنا قاسيەتتى رامازان ايىنىڭ باستالۋىنا وراي قۇتتىقتاۋ جەدەلحاتتارى كەلىپ ءتۇسىپ جاتىر، دەپ حابارلايدى قازاقپارات اقورداعا سىلتەمە جاساپ.

پرەزيدەنت قاسىم-جومارت توقايەۆتىڭ اتىنا قاسيەتتى رامازان ايىنىڭ باستالۋىنا وراي شەت مەملەكەتتەردىڭ باسشىلارىنان قۇتتىقتاۋ جەدەلحاتتارى كەلىپ ءتۇسىپ جاتىر.

وزبەكستان پرەزيدەنتى شاۆكات ميرزيەيەۆ ءوز قۇتتىقتاۋىندا ۇلتتىق داستۇرلەرى مەن ادەت-عۇرىپتارى ورتاق قازاق جانە وزبەك حالىقتارى رامازان ايىن بەيبىتشىلىك پەن تىنىشتىقتا، ءوزارا قۇرمەت پەن بىرلىك رۋحىندا قارسى الىپ جاتقانىن جازدى.

- سوڭعى جىلدارى ءبىزدىڭ ءوزارا كۇش-جىگەرىمىز بەن جاقىن دوستىق بايلانىستارىمىز باۋىرلاس حالىقتار اراسىنداعى ستراتەگيالىق سەرىكتەستىك پەن وداقتاستىق قاتىناستى جاڭا دەڭگەيگە كوتەردى. بۇل ورتاق ناتيجە ءبىزدىڭ ءوڭىردىڭ وركەندەۋىنە ۇلەس قوسىپ كەلەدى. وسىناۋ قاسيەتتى كۇندەرى مەن جاراتۋشىدان سىزگە زور دەنساۋلىق، ۇزاق عۇمىر، ەلىڭىزدى دامىتىپ، كوركەيتۋ جولىنداعى قىزمەتىڭىزگە تابىس، سونداي-اق باۋىرلاس قازاقستان حالقىنا بەيبىتشىلىك پەن باق-بەرەكە تىلەيمىن، - دەپ جازىلعان وزبەكستان پرەزيدەنتىنىڭ جەدەلحاتىندا.

ساۋد ارابياسىنىڭ كورولى - قوس كيەنىڭ ساقشىسى سالمان بەن ابدەلازيز ءال ساۋد جانە ساۋد ارابياسى كورولىنىڭ تاق مۇراگەرى مۇحاممەد بەن سالمان بەن ابدەلازيز ءال ساۋد قاسىم-جومارت توقايەۆتى قاسيەتتى رامازان ايىمەن قۇتتىقتاي وتىرىپ، وعان زور دەنساۋلىق، باقىت تىلەدى.

سونداي-اق باۋىرلاس قازاقستان حالقىنىڭ ودان ءارى دامىپ، گۇلدەنە بەرۋىنە تىلەكتەستىك بىلدىرگەن.

ب ا ءا پرەزيدەنتى مۇحاممەد بەن زايد ءال ناحايان قاسىم-جومارت توقايەۆقا دەنساۋلىق، باقىت، ال قازاقستاندىقتارعا - باق-بەرەكە تىلەپ، جىلى لەبىزىن جولداعان.

قاتار ءامىرى ءتاميم بەن حاماد ءال ءتاني مەملەكەت باسشىسىنا دەنساۋلىق پەن يگىلىك، ال قازاقستان حالقىنىڭ ءوسىپ-وركەندەي بەرۋىن تىلەگەن جانە ەلدەرىمىز اراسىنداعى ەكىجاقتى ىنتىماقتاستىقتى ودان ءارى نىعايتۋعا مۇددەلى ەكەنىن جەتكىزگەن.

سونىمەن قاتار مەملەكەت باسشىسىن يران پرەزيدەنتى يبراحيم رايسي، ب ا ءا ۆيتسە-پرەزيدەنتى، پرەمەر-ءمينيسترى، دۋباي امىرلىگىنىڭ بيلەۋشىسى مۇحاممەد بەن راشيد ءال ماكتۋم، قاتار مەملەكەتى ءامىرىنىڭ ورىنباسارى ابداللا بەن حاماد ءال تاني، ماروككو كورولى VI مۇحاممەد، كۋۆەيتتىڭ تاق مۇراگەرى مەشال ءال-احمەد ءال-دجابەر اس-ساباح، ليۆيا پرەزيدەنتتىك كەڭەسىنىڭ ءتوراعاسى مۇحاممەد يۋنيس ءال مانفي، پالەستينا مەملەكەتىنىڭ پرەزيدەنتى ماحمۋد ابباس قۇتتىقتادى.