قازاقستاننىڭ بەرگەن جاردەمى ءزىلزالانىڭ اۋىر سالدارىمەن كۇرەس كەزىندە حالقىمىزعا زور قولداۋ بولدى - ەردوعان
تۇركيا پرەزيدەنتى رەجەپ تايپ ەردوعان ءوزىنىڭ حاتىندا تۇركيانىڭ قاحرامانماراش پروۆينتسياسى مەن باسقا دا ەلدى مەكەندەرىنە وراسان زور زاردابىن تيگىزگەن جويقىن جەر سىلكىنىسىنە بايلانىستى باۋىرلاس ەلدىڭ قايعىسىنا ورتاقتاسىپ، كوڭىل ايتقانى، سونداي-اق جەدەل كومەك كورسەتكەنى ءۇشىن مەملەكەت باسشىسى قاسىم-جومارت توقايەۆقا تۇركيا حالقىنىڭ جانە جەكە ءوزىنىڭ اتىنان العىس ايتقان.
- وسىنداي تابيعي اپات كەزىندە دوستاس ەلدەردىڭ جانىمىزدان تابىلۋى قيىندىققا قارسى تۇرۋعا كۇش بەرەدى. قازاقستاننىڭ بەرگەن جاردەمى جەر سىلكىنىسىنىڭ اۋىر سالدارىمەن كۇرەس كەزىندە حالقىمىزعا زور قولداۋ بولدى. ەلىڭىزدىڭ ىزدەستىرۋ-قۇتقارۋ توبى ءۇيىندى استىندا قالعان ادامداردى امان ساقتاپ قالۋ ءۇشىن ايانباي ەڭبەك ەتىپ، ەرىك-جىگەر تانىتقانىن ءاردايىم ريزاشىلىقپەن ەسكە الامىز، - دەپ جازىلعان العىس حاتتا.
سونىمەن قاتار رەجەپ تايپ ەردوعان قاسىم-جومارت توقايەۆقا جانە دوستاس ءارى باۋىرلاس قازاقستان حالقىنا اماندىق پەن باق-بەرەكە تىلەدى.
ەسكە سالا كەتەيىك، تۇركياداعى جەر سىلكىنىسىنەن كەيىن قازاقستاننان 100 دەن استام مامان كومەككە باردى.