سەمەيدە الەۋمەتتىك جەلى ارقىلى الدايتىن الاياقتار كوبەيگەن
بۇل تۋرالى قالالىق پوليتسيا باسقارماسىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
كومپيۋتەر مەن ۇيالى تەلەفون ارقىلى ينتەرنەت باعدارلامالارىن شەبەر پايدالاناتىن الاياقتاردىڭ تاعى ءبىر ءتۇرى ساۋدا-ساتتىق پلاتفورمالارىن دا نازاردا ۇستايدى. ماسەلەن، جاقىندا سەمەيلىك زەينەتكەر OLX.kz سايتىنان جاتىن بولمە گارنيتۋرى تۋرالى حابارلامانى كورىپ، ۇناتقان جيھازىن ءتيىمدى باعامەن ساتىپ الماق بولادى. ول كورسەتىلگەن ۇيالى تەلەفون نومىرىنە بايلانىسقا شىعىپ، 27 جاسار الاياقتىڭ شوتىنا 220 مىڭ تەڭگە اقشا اۋدارىپ جىبەرگەن. ءبىراق، الدانىپ قالعانىن دەر كەزىندە اڭعارىپ، پوليتسياعا جۇگىنەدى. اتالعان فاكتى بويىنشا قازىر ق ر ق ك 190-بابىنىڭ 2-بولىگى بويىنشا سوتقا دەيىنگى تەرگەۋ امالدارى ءجۇرىپ جاتىر.
«الاياقتار سونداي-اق، AnyDesk, TeamWiever سياقتى موبيلدى باعدارلامالاردى جۇكتەپ الۋدى «وتىنەدى» دە، ناتيجەسىندە سونىڭ كومەگى ارقىلى جەكە شوتتارىڭىزعا قول جەتكىزە الادى. ءسويتىپ، شوتىڭىزداعى اقشانى ءۇشىنشى بىرەۋگە اۋدارىپ جىبەرەدى. سوندىقتان، تانىمايتىن بىرەۋلەر قوڭىراۋ شالىپ، بانكتىك دەرەكتەمەلەردى سۇراعان جاعدايدا اڭگىمەنى بىردەن توقتاتىپ، بانك مەنەدجەرىنە حابارلاسىپ، كارتاسىن بۇعاتتاتىپ، پوليتسياعا حابار بەرگەنى دۇرىس»، - دەيدى سەمەي قالاسى پوليتسيا باسقارماسىنىڭ باسپا ءسوز حاتشىسى لۋنارا مۇقانوۆا.
باسقارما قىزمەتكەرلەرى ينتەرنەت الاياقتىعىنىڭ ءورىس الىپ بارا جاتقانىن ەسكەرتىپ، قالا تۇرعىندارىن مەيلىنشە ساق بولۋعا شاقىرادى.
«نەگىزىنەن قىلمىس جاساۋشىلاردىڭ دەنى وزگە ەلدەن بولعاندىقتان، قىلمىسكەرلەردى انىقتاۋ وتە كۇردەلى. الايدا، ءتارتىپ ساقشىلارى بۇعان قاراماستان، ينتەرنەت الاياقتىعىمەن بارىنشا كۇرەسىپ كەلەدى»، - دەيدى قالالىق پ ب باسپا ءسوز قىزمەتى.