ەلىمىزدە جەتەكشى اۋە كومپانيالارى بىرنەشەۋ بولىپ ءبولىنۋى مۇمكىن
بۇل تۋرالى باسەكەلەستىكتى قورعاۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى رۋستام احمەتوۆ ءمالىم ەتتى، دەپ حابارلايدى قازاقپارات ءتىلشىسى.
«ازاماتتىق اۆياتسيا نارىعىندا جوعارى شوعىرلانۋ بايقالادى. «ەير استانا» كومپانياسى قىزمەتىنە مەملەكەتتىڭ قاتىسۋ ۇلەسى - %76. بۇل اشىق اسپان رەجيمىن رەتتەيتىن اقپاراتتىڭ شەكتەلۋىنە، اۆياوتىن ساتۋشىلار اراسىندا باسەكەلى ورتانىڭ بولماۋىنا، جوعارى باعا، وتىن جەتىسپەۋشىلىگىنە جانە اۋەجايدى پايدالانۋشىلار تاراپىنان شەكتەۋلەرگە اكەلىپ وتىر»، - دەدى رۋستام احمەتوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، اگەنتتىك جوعارىدا اتالعان ماسەلەنى شەشۋ بويىنشا ءبىرقاتار ءىس-شارانى قاراستىرىپ وتىر.
«الدىمەن اۋەكومپانيا اكتيۆتەرىن جەكەشەلەندىرۋ نارىعىندا مەملەكەتتىڭ قاتىسۋ دەڭگەيىن تومەندەتۋ، اۋە قاتىناسى نارىعىندا شوعىرلانۋدى ازايتىپ، باسەكەلەستىكتى ارتتىرۋ ءۇشىن جەتەكشى اۆياكومپانيالاردى ءبولۋ، شەتەلدىك تاسىمالداۋشىلاردى تارتۋ ءۇشىن 2028-جىلعا دەيىن اشىق اسپان رەجيمىنىڭ مەرزىمىن ۇلعايتۋ جانە اۆياوتىن ساتۋشىلار مەن اۋەجايلار اراسىندا باسەكەلى ورتا قۇرۋدى كوزدەپ وتىرمىز»، - دەيدى ول.