الماتىلىق دارىگەر ۇشاقتا جۇرەك تالماسى ۇستاعان جولاۋشىنى قۇتقارىپ قالدى
اۋرۋحانا باسپا ءسوز قىزمەتىنىڭ مالىمەتىنشە، ناۋرىزدىڭ 24 ىنەن 25 ىنە قاراعان ءتۇنى قازاقستاندىق تۋريستەر مىسىرلىق شارم-ەل-شەيح كۋرورتىنان الماتىعا ۇشىپ كەلە جاتقان. ۇشۋدىڭ ەكىنشى ساعاتىندا 72 جاستاعى جولاۋشىنىڭ جاعدايى ناشارلاعان. جولسەرىكتەر جولاۋشىلار اراسىنان دارىگەر ىزدەپ، حابارلاما جاسايدى. ۇشاق بورتىندا بولعان دارىگەر نۇرجان اجىبەكوۆ پەن س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ ءۇش ستۋدەنتى بىردەن جاۋاپ قاتادى.
ەگدە جاستاعى ايەلدە جۇرەك تالماسىنىڭ بارلىق بەلگىلەرى بايقالعان. ۇشاق الماتىعا قونعانشا 4 ساعات بويى مەديتسينا قىزمەتكەرلەرى رەانيماتسيالىق شارالار جۇرگىزىپ، شۇعىل كومەك كورسەتەدى.
«باستاپقى تەكسەرۋ كەزىندە ميوكارد ينفاركتىسىنىڭ دامۋ قاۋپى بار دەپ كۇدىكتەندىم. ايەل ەس-ءتۇسسىز جاتتى، وعان دەيىن قۇسقان، سۋىق تەر شىقتى، تامىر سوعىسى ارەڭ سەزىلدى، قان قىسىمى تومەن بولدى. سودان كەيىن حاتتاما بويىنشا ارەكەت ەتتىك: تامىرلىق كىرۋ جاسادىم، قۇسۋدان اسفيكسيانى بولدىرماۋ ءۇشىن اۋىز-جۇتقىنشاقتى تازالادىق، سودان كەيىن جۇرەككە تۇسەتىن جۇكتەمەنى ازايتۋ ءۇشىن ناۋقاستىڭ اياعىن 60 گرادۋسقا قا كوتەردىك. ناۋقاسقا وتتەگى بەرەتىن بوبروۆ اپپاراتىن قوستىق. ستۋدەنتتەر بەلسەندى تۇردە كومەكتەستى. قابىلدانعان شارالاردىڭ ناتيجەسىندە قان قىسىمى 80/60 تان 130/80 گە، قانىقتىلىق 87 دەن 96 عا كوتەرىلدى. ايەل ەسىن جيا باستادى. شاعىمى جالپى السىزدىك بولدى. الدىمىزدا كەلەسى ماسەلە تۋىندادى: كەرى ۇشىپ، جاقىن جەردەگى يران ەلىنە قونىپ، جولاۋشىنى اۋرۋحاناعا جەتكىزۋ نەمەسە وتتەگى جاعدايىن ساقتاپ، قازاقستانعا ۇشۋدى جالعاستىرۋ. قۇدايعا شۇكىر، بۇل رەيس بارلىق قاجەتتى ءدارى- دارمەكپەن جانە قۇرالمەن جابدىقتالعان بولاتىن، بۇل بىزگە ايەلدى تۇراقتى جاعدايدا ۇستاۋعا مۇمكىندىك بەردى، ۇيگە ۇشامىز دەگەن شەشىم قابىلداندى. ءبىزدىڭ مىندەتىمىز - رەيس سوڭىنا دەيىن ومىرلىك ماڭىزدى كورسەتكىشتەردى ساقتاۋ بولدى»، - دەيدى نۇرجان اجىبەكوۆ.
نۇرجان اجىبەكوۆ - باس ميى مەن ومىرتقاعا ەڭ كۇردەلى جوعارى تەحنولوگيالىق وپەراتسيالار جاسالاتىن الماتى قالاسى 4№ قالالىق اۋرۋحانا نەيروحيرۋرگيا بولىمشەسىنىڭ مەڭگەرۋشىسى. سول كۇنى دارىگەر وتباسىمەن دەمالىستان كەيىن ۇيىنە قايتىپ كەلە جاتقان.
دارىگەرگە كومەك كورسەتكەن ستۋدەنتتەردىڭ ەسىمدەرى دە بەلگىلى: داۋلەت قاجىروۆ، جارقىن راحات جانە سايدا بارماعامبەتوۆا.
«شارم-ەل-شەيح-الماتى رەيسىنىڭ ۇشاق بورتىندا جاعدايى ناشارلاعان انامنىڭ ءومىرىن امان الىپ قالعان نۇرجان ورىنتاي ۇلىنا العىس بىلدىرگىم كەلەدى. مەنىڭ انامنىڭ اتى - كۇلجامال راحمەتۋللا قىزى، 72 جاستا. ءبىز مىسىردان قايتىپ كەلە جاتقان ەدىك. ۇشاق جوعارى كوتەرىلگەننەن كەيىن، 5 مينۋتتان سوڭ انام ءوزىن ناشار سەزىنە باستادى، بەلى اۋىرىپ، سودان كەيىن باسى دا اۋىرا ءتۇستى. مەن ستيۋاردەسسالارعا كومەككە جۇگىردىم، ولار اعىلشىن تىلىندە «ۇشاقتا دارىگەرلەر بار ما؟» دەپ سۇراۋ سالدى. بىردەن نۇرجان ورىنتاي ۇلى جانە 2 جىگىت پەن ءبىر قىز جاۋاپ بەردى. ستيۋاردەسسالار مورلەنگەن العاشقى مەديتسينالىق كومەك قوبديشاسىن اشۋ ءۇشىن دارىگەردىڭ جەكە كۋالىگىن سۇرادى. قۇدايعا شۇكىر، قۇجاتتارىن كورسەتە الدى، ول كەزدە انام قۇسىپ، ەسىنەن تانىپ قالعان ەدى. دارىگەر نۇرجان ورىنتاي ۇلىنىڭ ارقاسىندا انام امان قالدى»، - دەيدى جولاۋشىنىڭ قىزى.
تۋىستارىنىڭ ايتۋىنشا، كۇلجامال راحمەتۋللا قىزى الماتىعا كەلگەننەن كەيىن بىردەن اۋرۋحاناعا جاتقان، بۇگىندە جاعدايى ءبىرشاما جاقسارىپتى.