اقمولا وبلىسىندا ستۋدەنتتەردىڭ جاپپاي ۋلانۋىنا بايلانىستى ءىس قوزعالدى

كوكشەتاۋ. قازاقپارات - اقمولا وبلىسىندا ستۋدەنتتەردىڭ جاپپاي ۋلانۋىنا بايلانىستى سوتقا دەيىنگى تەرگەۋ شارالارى قولعا الىندى، دەپ حابارلايدى قازاقپارات ءتىلشىسى وبلىستىق پد باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، بيىلعى جىلعى ناۋرىزدىڭ 29-دا كوكشەتاۋ قالالىق پوليتسيا باسقارماسىنا اقمولا وبلىسىنىڭ سانيتارلىق- ەپيدەميولوگيالىق باقىلاۋ دەپارتامەنتىنەن 15-ناۋرىزدا وبلىس ورتالىعىنىڭ ءدامحانالارىنىڭ بىرىندە كوللەدجدىڭ 17 ستۋدەنتى ۋلانعانى تۋرالى ارىز تۇسكەن.

«كەشكى استان كەيىن جاستار جۇرەك اينۋ، قۇسۋ جانە ءىش ءوتۋ قولايسىزدىقتارىنا شاعىمدانا باستاعان. سانيتارلىق قىزمەت اۋرۋدىڭ تارالۋىنا ىقپال ەتكەن ءبىرقاتار سانيتارلىق ەرەجەلەردىڭ بۇزۋشىلىقتارىن انىقتادى. پوليتسيا باسقارماسى ءدامحانا يەسىنە قاتىستى ق ر ق ك 304-بابىنىڭ 1-بولىگى «سانيتارلىق ەرەجەلەردى بۇزۋ» بويىنشا سوتقا دەيىنگى تەرگەۋدى باستادى»، - دەدى ۆەدومستۆودان.

ايتا كەتسەك، كوكشەتاۋدا ءدامحانادا كەشكى اس ىشكەن 17 ستۋدەنت ۋلانىپ قالدى.