ش ق و دارىگەرلەرى سيرەك جاسالاتىن ادىسپەن جاس جىگىتتىڭ اياعىن ساقتاپ قالدى
بىرنەشە جەردەن جاراقات العان جاس جىگىتتىڭ اياعىن ساقتاپ قالۋ ءۇشىن تراۆماتولوگ- حيرۋرگتار Masquelet ادىستەمەسىن قولداندى.
موتوسيكل تىزگىنىنە يە بولا الماي قالعان ياروسلاۆ پياتكوۆ جول اپاتىنا ءتۇسىپ، جامباسىن بىرنەشە جەردەن سىندىرىپ العان. جامباستىڭ اشىق سىنىعىنا، الدىمەن وبلىستىق بالالار اۋرۋحاناسىندا وتا جاسالدى.
الايدا ءبىراز ۋاقىتتان كەيىن جارا اسقىنىپ، ىرىڭدەپ كەتكەن سوڭ، ناۋقاس شىعىس قازاقستان وبلىستىق اۋرۋحاناسىنا جەتكىزىلگەن. قايتا وتا جاسالعانىمەن، ناۋقاستىڭ جاعدايى جاقسارمادى. سونىڭ سالدارىنان اشىق سىنىقتاردىڭ كۇردەلى جانە قاۋىپتى اسقىنۋى ءورشي بەردى.
«حالىقارالىق تراۆماتولوگيا جانە ورتوپەديا عىلىمي ورتالىعىنداعى ارىپتەستەر بىزگە ەمدەۋ ءۇشىن الەمدىك ورتوپەديالىق پراكتيكادا كەڭ تارالعان، ءبىراق قازاقستاندا وتە سيرەك جاسالاتىن Masquelet ادىستەمەسىن قولدانۋدى ۇسىندى. ورتالىقتىڭ ديرەكتورى ەركىن ءجۇنىسوۆ وپەراتسيانى جۇرگىزۋگە كومەكتەسۋ ءۇشىن الماتىدان ءوزى ارنايى كەلدى» ، - دەدى وبلىستىق اۋرۋحانانىڭ ورتوپەديا ءبولىمىنىڭ مەڭگەرۋشىسى دۋمان باكەربەكوۆ.
ونىڭ ايتۋىنشا، بۇل ادىستەمە ەكى كەزەڭنەن تۇرادى. ءبىرىنشى كەزەڭدە سۇيەكتىڭ نەكروزدان زارداپ شەككەن تۇسى الىنىپ تاستالدى. ونىڭ ورنىنا انتيبيوتيكپەن ارالاستىرىلعان سەمەنت يمپلانت ۋاقىتشا قويىلدى. انتيبيوتيك جارانىڭ قابىنۋىن توقتاتادى.
«التى اپتادان كەيىن ونىڭ ورنىنا سۇيەك يمپلانتىن ورناتامىز. وسىلايشا، ءبىرىنشى كەزەڭ ءساتتى ءوتتى. بىرنەشە كۇننەن كەيىن جارانىڭ قابىنۋى باسىلدى. ناۋقاس جاعدايىنىڭ جاقسارعانىن ايتۋدا»، - دەدى دۋمان باكەربەكوۆ.
پاتسيەنت ياروسلاۆ پياتكوۆ دارىگەرلەرگە ريزاشىلىعىن ايتتى. وعان بۇل مەديتسينالىق كومەك م ءا م س اياسىندا تەگىن كورسەتىلگەن.
«اۋرۋحانادا دارىگەرلەر ماعان جاقسى قارادى. ۇنەمى قامقورلىق تانىتىپ، قولداۋ كورسەتۋدە. وسىندا جاتىپ تۋىستارىمدى، دوستارىمدى ساعىندىم. تەزىرەك كوللەدجدەگى وقۋىما ورالسام دەيمىن. سوڭعى وتادان كەيىن ءوزىمدى بىردەن جاقسى سەزىندىم، اۋىرسىنۋ ازايدى، ءىرىڭ جوق»، - دەدى جاس جىگىت.