الماتىداعى «ساياحات» اۆتوبەكەتىنىڭ ورنىنا نە سالىنادى

الماتى. قازاقپارات - الماتىدا بۇرىن «ساياحات» اۆتوبەكەتى تۇرعان اۋماقتا جاڭا تۇرعىن ءۇي كەشەنى، مەكتەپ، بالاباقشا، ساياباق سالىنىپ، ۇلكەن ساعات قايتا قالپىنا كەلۋى ءتيىس.

بۇل تۋرالى الماتى قالاسى اكىمدىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.

الماتى اكىمدىگىنىڭ مالىمەتىنشە، رايىمبەك داڭعىلىنىڭ سولتۇستىگى مەن ءسۇيىنباي داڭعىلىنىڭ شىعىسىندا ورنالاسقان اۋدانى 4,4 گەكتار «كوممەرتسيالىق ءۇي-جايلار مەن جەراستى پاركينگى بار كوپفۋنكتسيونالدى تۇرعىن ءۇي كەشەنى» نىسانالى ماقساتى بار جەر ۋچاسكەسى 2018-جىلدىڭ قازان ايىنداعى 3852№ مەنشىككە بەرۋ شارتى نەگىزىندە «Sayahat Realty» ج ش س- نە تيەسىلى. سونىمەن بىرگە، ەگجەي-تەگجەيلى جوسپارلاۋ جوباسىنا سايكەس، «ساياحات» اۆتوبەكەتىنىڭ اۋدانى - پۋشكين كوشەسىنىڭ (رايىمبەك داڭعىلىنان گوگول كوشەسىنە دەيىن) اۆتوكولىك جولى بويىنداعى اۋماقتى قايتا قۇرۋ جوباسىنا (ماستەر-جوسپار) كىرەدى.

«اتالعان جەر ۋچاسكەسى قۇقىق بەلگىلەيتىن قۇجاتتار نەگىزىندە زاڭدى تۇلعانىڭ مەنشىگىندە. مەنشىك يەسىنىڭ ايتۋىنشا، اۋماقتا جالپى ءبىلىم بەرەتىن مەكتەپ جانە بالاباقشا سالۋ جۇمىستارى جوسپارلانعان. الماتىلىقتاردىڭ ەسىندە قالعان ۇلكەن ساعات قايتا قالپىنا كەلتىرىلەدى. سونداي- اق، شامامەن 1,3 گەكتار اۋماقتا ساياباق سالۋ جوسپارلانىپ وتىر. قازىرگى تاڭدا قۇرىلىس-مونتاجداۋ جۇمىستارى (ق م ج) ءجۇرىپ جاتقان جوق. قۇرىلىس سالۋشى بارلىق زاڭنامالىق راسىمنەن وتكەن سوڭ عانا ق م ج- عا كىرىسە الادى. قۇرىلىس جۇمىستارىن، ونىڭ ىشىندە ق م ج- نىڭ باستالۋ جانە اياقتالۋ مەرزىمىن باقىلاۋ الماتى قالاسىنىڭ قالا قۇرىلىسىن باقىلاۋ باسقارماسىنىڭ قۇزىرەتىنە كىرەدى»، - دەپ حابارلادى اكىمدىكتەن.

سونداي-اق، ۆەدومستۆودا مەگاپوليستىڭ جاڭا باس جوسپارى بويىنشا كولىك-ترانسپلانتاتسيالاۋ توراپتارى (ت پ ۋ) قالانىڭ شىعىس جانە باتىس بولىگىندە: باتىس ت پ ۋ - «بارلىق» بازارىنىڭ ورنى، شىعىس ت پ ۋ - الماتى-2 ۆوكزالىنىڭ ماڭىندا قاراستىرىلعانىن حابارلادى.

ەسكە سالساق، الماتىداعى «ساياحات» اۆتوبەكەتى 2008-جىلى سۇرىلگەن بولاتىن. قالا اكىمدىگى سول كەزدە بۇل شەشىمدى كولىك-ترانسپلانتاتسيالاۋ تورابىنىڭ وزەكتىلىگى بولماۋىنا بايلانىستى قابىلداعان. سونىمەن قاتار، اۆتوبەكەت الماتى قالاسىنىڭ تاريحي جانە ساۋلەت ەسكەرتكىشتەرىنىڭ تىزىمىنە ەنبەگەن.

سونداي-اق، بۇعان دەيىن الماتى اكىمى ەربولات دوسايەۆتىڭ جەتىسۋ اۋدانىنىڭ تۇرعىندارىمەن كەزدەسۋى كەزىندە اۋدان اكىمى گۇلنار كوكەبايەۆا «ساياحات» اۆتوبەكەتى ماڭىنان جاڭا ەمحانا سالىناتىنى تۋرالى ايتقان ەدى.